धादिङमा २ हजार ६८ जना डेंगुका बिरामी(कहाँ कति संक्रमित विवरण सहित)

अडियोमा सुन्नुहोस

धादिङ,१७ कात्तिक ।
धादिङमा दिनप्रतिदिन डेंगु रोगको प्रकोप बढेको छ ।पछिल्लो २४ घण्टामा थप २९ जनामा डेंगु संक्रमण पुष्टि भएको छ ।

१४ जना पुरुष र १५ जना महिला गरी कुल २९ जना डेंगुका नयाँ बिरामी थपिएको स्वास्थ्य कार्यालय धादिङले जनाएको छ। यो सँगै जिल्लामा कुल संक्रमित २ हजार ६८ पुगेको छ।

हालसम्म जिल्लाका १ हजार ११५ जना पुरुष र ९५२ महिला गरी कुल २ हजार ६८ जनामा संक्रमण पुष्टि भएको स्वास्थ्य कार्यालयको विवरणमा उल्लेख गरिएको छ । जिल्लाको कुल संक्रमितमध्ये आधा भन्दा बढि संक्रमित नीलकण्ठ नगरपालिकामा रहेका छन् ।

नगरपालिकामा हालसम्म १ हजार २६६ जना संक्रमित भएका छन् भने गल्छीमा १०८, गजुरीमा १०६, बेनिघाट रोराङमा ९५, धुनिबेशीमा ९०,ज्वालामुखीमा ७९, त्रिपुरासुन्दरीमा ७५ जनामा संक्रमण भएको छ।

यस्तै सिद्धलेकमा ५७, गंगाजमुनामा ३१, थाक्रेमा १८,नेत्रावती डवजोङमा १४,रुवीभ्यालीमा १२ र खनियाबास गाउँपालिकामा ७ जनामा संक्रमण पुष्टि भएको छ ।

जिल्लाको कुल संक्रमित मध्ये १०२ जनाको ठेगाना खुलेको छैन भने ८ जना अन्य जिल्लामा परिक्षण गरिएको स्वास्थ्य कार्यालयको विवरणमा उल्लेख गरिएको छ ।

अझै केही समय डेंगु सङ्क्रमण हुनसक्ने भन्दै कार्यालयले सचेत बन्न सबैलाई आह्वान गरेको छ। जाडो बढेसँगै डेंगु कम हुँदै जाने अनुमान गरिएको छ।