बेनिघाट रोराङको प्रशासनिक भवन निर्माण अन्तिम चरणमा

अडियोमा सुन्नुहोस

धादिङ,०९ फागुन।
धादिङको बेनिघाट रोराङ गाउँपालिकाको प्रशासनिक भवनको निर्माण अन्तिम चरणमा पुुगेको छ। काम सम्पन्न गर्ने निर्धारित मितिभन्दा अगाडि नै भवन निर्माण सम्पन्न गर्ने लक्ष्यसाथ काम तिव्र गतिमा अघि वढेको छ ।

बेनिघाट रोराङ गाउँपालिकास्थित विशालटारमा रु ७ करोड ८७ लाख ४१ हजार लागतमा २०७८ असार ७ गतेदेखि निर्माण शुरु गरिएको प्रशासनिक भवन निर्माणको काम ८५ प्रतिशत सम्पन्न भएको गाउँपालिकाका ईन्जिनियर प्रकाश सिलवालले बताउनुभयो ।

एक हजार २ रोपनी क्षेत्रफलमा निर्माणधिन भवनमा एक तला कार्यपालिका र दुई तला प्रशासनिक भवनको रुपमा रहने सिलवालले बताउनुभयो ।उहाँका अनुसार भवनमा २४ वटा शाखा अट्ने छन् ।

निर्माणाधिन भवन अपाङ्गमैत्री, बालमैत्री, वातावरणमैत्री, लिफ्ट, ब्रेष्ट फिडिङ, पुस्तकालय, सेवाग्राही वेटिङ रुम तथा दुईसय जनाभन्दा बढि अट्ने हलसहित हुने गाउँपालिकाका ईन्जिनियर सिलवालको भनाई छ ।

आगामी २०८० असार ६ गतेसम्म निर्माण अवधि भएपनि निर्माण कम्पनीले सम्झौताअघि नै काम सम्पन्न गर्ने सिलवालले बताउनुभयो । समय भन्दा अघि नै निर्माण सम्पन्न गरेर आगामी बैशाख महिनाभित्रै गाउँपालिका कार्यालय नयाँ भवनमा सर्ने योजना रहेको सिलवालले बताउनुभयो । भवनको ठेक्का निर्माण कम्पनी ओमबुद्ध ज्वालामुखी भेनस जे.भीले लिएको छ ।