नौबिसे–नागढुंगा सुरुङमार्ग छिचोल्न अब ३३७ मिटर बाँकी,१६ महिनाभित्र सम्पन्न गर्ने लक्ष्य

अडियोमा सुन्नुहोस

धादिङ । नौबिसे–नागढुंगा सुरुङमार्गको मुख्य सुरुङ छिचोल्न अब ३३७ मिटर मात्रै बाँकी रहेको छ।

२ हहार ६८८ मिटरमध्ये कुल लम्बाइ रहेको सुरुङमार्गको अहिलेसम्म २ हजार ३४० मिटर सुरुङ खन्ने काम सकिएको नागढुंगा सुरुङमार्ग निर्माण आयोजना प्रमुख नवीनमान श्रेष्ठले बताउनुभयो।

हालसम्म सुरुङमार्गतर्फको भौतिक प्रगति भने ९३.७० प्रतिशत भएको र र ५७.२७ प्रतिशत वित्तीय प्रगति भएको श्रेष्ठले बताउनुभयो।

सुरुङ मार्गका आवश्यक सम्पूर्ण काम सम्पन्न गर्न भने अझै १६ महिनाभन्दा धेरै समय लाग्ने उहाँको भनाई छ। इभ्याक्युएसन टनेल भने गत अगष्ट ७ मा ब्रेक थ्रु भएको थियो।वर्किङ अडिटतर्फ १२६ मिटर काम भएको आयोजनाले जनाएको छ।

त्यसैगरी क्रस प्यासेजतर्फ पनि एक सय २८ मिटर काम भएको छ। सुरुङमार्गको भुइँ ढलान–कंक्रिट लाइलिङको काम भने एक हजार दुई सय ५३ मिटर अर्थात् ४६.६० प्रतिशत मात्रै काम भएको आयोजनाका प्रमुख श्रेष्ठले बताउनुभयो।

सुरुङ मार्गको बाँकी लाइलिङको काम गर्न अझै ६ महिनाभन्दा धेरै समय लाग्ने उहाँको भनाई छ।आयोजनाका अनुसार पछिल्लो समय स्थानीयले सुरुङमार्गभन्दा माथिल्लो भागको पनि मुआब्जा माग्दै आइरहेका छन्।फ्लाइओभर निर्माणका लागि आवश्यक पर्ने जग्गााको ९५ प्रतिशत मुआब्जा र क्षतिपूर्ति भने वितरण गरिसकेको आयोजनाले जनाएको छ।

अहिलेसम्म फ्लाइओभरको तीन वटा फाउन्डेसन र दुई वटा सबस्ट्रक्चरको काम सम्पन्न भइसकेको छ भने अझै तीन वटा सबस्ट्रक्चरको काम हुन बाँकी छ।

धादिङ र काठमाडौंतर्फ ५–५ सय मिटर सडक, दुई फ्लाइओभर र सुरुङमार्ग तथा मुआब्जासहित उक्त आयोजनामा करिब साढे २२ अर्ब लागत लाग्नेछ।जापानी कम्पनी हाज्मा आन्दो कर्पाेरेसनले ठेक्का दिएको यो परियोजना निर्माणमा जापानी सहयोग नियोग जाइकाले साढे १६ अर्ब ऋण र नेपाल सरकारको करिब ६ अर्ब गरी कुल साढे २२ अर्ब रूपैयाँ लाग्नेछ।