धादिङमा ६.१ रेक्टरस्केलको भूकम्पपछि पटक-पटक परकम्प,सतर्कता अपनाउन भूकम्पविद्को आग्रह

अडियोमा सुन्नुहोस

धादिङको ज्वालामुखी गाउँपालिकास्थित खरी आसपास केन्द्रबिन्दु भएर ६ दशमलव १ रेक्टरस्केलको भूकम्प गएपछि पटक–पटक परकम्प गइरहेको छ।

आज बिहान ७ बजेर ३९ मिनेटमा गएको भूकम्पपछि लगातारजसो परकम्प गइरहेको राष्ट्रिय भूकम्प मापन केन्द्रका वरिष्ठ भूकम्पविद् डा.लोकविजय अधिकारीले बताउनुभयो।

थप ठूलो धक्कासमेत आउन सक्ने जोखिम रहेकाले सतर्कता अपनाउन उहाँले आग्रह गर्नुभयो ।डा.अधिकारीले भूकम्प प्रभावित क्षेत्रका बासिन्दालाई खुलाचौरमा बस्न अनुरोध गर्नुभएको छ ।

बिहान भूकम्प गएपछि धादिङका धेरै ठाउँका बासिन्दा घर बाहिर निस्किएका थिए ।

भूकम्पको धक्का काठमाण्डौ उपत्यका आसपासका क्षेत्रमा समेत महसुस भएको थियो । भूकम्पका कारण क्षति भए नभएकोबारे विवरण आउन बाँकी छ ।

यसअघि गएको असोजमा बझाङ केन्द्रबिन्दु बनाएर पटक–पटक भूकम्प गएको थियो । त्यसपछि बझाङमा लगातारजसो साना र मध्यम भूकम्प र परकम्प गइरहेको बेला धादिङ केन्द्रबिन्दु भएर भूकम्प गएको हो ।

नेपाल भूकम्पको उच्च जोखिमयुक्त क्षेत्र रहेकाले जुनसुकै बेला पनि ठूलो भूकम्पको जोखिममा छ । पछिल्लो समय नेपालको पूर्वी तथा पश्चिमी क्षेत्रमा स–साना भूकम्प गइरहेका छन् ।