छुवाछुत कसुरमा वडाध्यक्षलाई चार महिना कैद र ७५ हजार जरिबाना

अडियोमा सुन्नुहोस

जिल्ला अदालत कास्कीले जातीय भेद्भाव तथा छुवाछुतसम्बन्धी कसुरमा पोखरा महानगरपालिका–२४ का वडाध्यक्ष भरतबहादुर अधिकारीलाई साढे चार महिना कैद र ७५ हजार रुपैयाँ जरिबानाको फैसला गरेको छ।

वडाध्यक्ष अधिकारीलाई जिल्ला न्यायाधीश अवनी मैनाली भट्टराईको एकल इजलासले कैद र जरिबानाको आदेश गरेको हो।

वडाध्यक्ष अधिकारीले सार्वजनिक कार्यक्रममै आफूमाथि जातीय विभेदजन्य गाली गलौज गरेको भन्दै नेपालीले जिल्ला प्रहरी कार्यालय कास्कीमा गएको वर्ष पुस २४ मा जाहेरी दर्ता गराउनुभएको थियो ।

नेपालीको किटानी जाहेरीपछि अधिकारी पुस २६ मा पक्राउ परेर माघ ९ मा एक लाख ५० हजार रुपैयाँ धरौटीमा रिहा हुनुभएको थियो ।

जातीय तथा अन्य सामाजिक छुवाछुत र भेद्भावसम्बन्धी कसुर र सजाय ऐन, २०६८ को दफा ७ बमोजिम फैसला भएको हो । यो दफामा जातीय विभेद गरेको ठहरिएमा पीडकलाई तीन महिनादेखि तीन वर्षसम्म कैद र ५० हजारदेखि दुई लाख रुपैयाँसम्म जरिबानाको व्यवस्था छ ।

यो दफा अनुसार तीन महिना कैद सजायको व्यवस्था रहे पनि वडाध्यक्ष अधिकारी सार्वजनिक पद धारण गरेको व्यक्ति भएकाले ५० प्रतिशत थप सजाय भएको जनाईएको छ ।