बाग्मतीले चिउरी र चमेरो संरक्षण गर्ने,धादिङको २ सहित छ पालिकामा लागू गर्ने तयारी

अडियोमा सुन्नुहोस

धादिङ ।बाग्मती प्रदेश सरकारले चिउरी र चमेरो संरक्षण गर्ने भएको छ ।प्रदेशले चेपाङ समुदायको उत्थानका लागि धादिङको २ सहित छ वटा पालिकामा लागू गर्ने तयारी गरेको छ ।

चेपाङ समुदायको बसोबास रहेको धादिङको गजुरी र बेनिघाट रोराङ गाउँपालिकामा,चितवनको राप्ती र कालिका नगरपालिका, चितवनको इच्छाकामना, मकवानपुरको राक्सिराङमा यो कार्यक्रम लागू गर्ने तयारी गरेको सामाजिक विकास मन्त्रालयले जनाएको छ।

मन्त्रालयले कार्यविधि निर्माण गरेर अर्थ मन्त्रालयमा पठाएको र मन्त्रिपरिषदबाट कार्यविधि पारित भएपछि कार्यान्वयनका लागि पालिकामा बजेट पठाइने सामाजिक विकास मन्त्रालयको सामाजिक विकास महाशाखा प्रमुख गोपालप्रसाद कँडेलले जानकारी दिनुभयो ।

प्रदेश सरकारले यस वर्ष चिउरी र चमेरो संरक्षणका लागि ५० लाख रुपैयाँ बजेट विनियोजन गरेको छ ।

बाग्मती प्रदेशका मुख्यमन्त्री शालिकराम जम्कट्टेलले चेपाङ समुदायको संरक्षणसँगै चिउरी र चमेराको समेत संरक्षण गरिने बताउनुभयो ।

प्रदेश सरकारले ल्याएको यो कार्यक्रम नमूना कार्यक्रम भएकाले सबै पालिकासँग समन्वय गरेर काम गरिने उहाँले बताउनुभयो।