आँबुखैरेनीमा बस दुर्घटना हुँदा ६ जना घाइते,घाइते दुई जना धादिङका

अडियोमा सुन्नुहोस

धादिङ-पृथ्वीराजमार्गअन्तर्गत तनहुँको आँबुखैरेनी गाउँपालिका–२ मा यात्रुवाहक बस दुर्घटना हुँदा छ जना घाइते भएका छन्।

आज बिहान काठमाडौंबाट पोखरातर्फ आउँदै गरेको ना५ख ४३७४ नम्बरको बस अनियन्त्रित हुुँदा सडकको बायाँतर्फ नालीमा खसेको जिल्ला प्रहरी कार्यालयका प्रहरी नायब उपरीक्षक दीपककुमार रायले जानकारी दिनुभयो।

दुर्घटनामा धादिङको ज्वालामुखी गाउँपालिका–७ बस्ने ३८ वर्षीय टेकनाथ कँडेल,१० वर्षीया सुरक्षा कँडेल, कास्कीको पोखरा महानगरपालिका–१३ बस्ने ३० वर्षीया सुनिता गुरुङ, पाँच वर्षीय रेशम सुनुवार, पोखरा महानगरपालिका–३२ बस्ने २५ वर्षीया संगीता तिवारी र २८ वर्षीय सन्दीप तिवारी घाइते भएको प्रहरी नायब उपरीक्षक रायले बताउनुभयो।

घाइतेहरुको आँबुखैरेनी अस्पतालमा उपचार भइरहेको प्रहरीले जनाएको छ ।