सिद्धलेकमा प्रमुख प्रशासकीय अधिकृत नियुक्तिमा विवाद,दुई जनाले पाए नियुक्ती

अडियोमा सुन्नुहोस

धादिङ । सिद्धलेक गाउँपालिकामा प्रमुख प्रशासकीय अधिकृत नियुक्तिमा विवाद भएको छ ।

गाउँपालिकामा दुई जनाले प्रमुख प्रशासकीय अधिकृतको नियुक्ती पाएपछी विवाद चर्किएको हो ।

संघीय मामिला तथा सामान्य प्रशासन मन्त्रालयले सिद्धलेकमा शिवराम अधिकारी र होमनाथ दाहाललाई एक साताको फरकमा प्रमुख प्रशासकीय अधिकृतको जिम्मेवारी दिएर पठाएपछि विवाद चर्किएको हो ।

बिहिबार मन्त्रालयले महिनौँदेखि प्रमुख प्रशासकीय अधिकृतविहीन रहेका सिद्धलेक र खनियाबास गाउँपालिका सहित देशभरका एक सय वटा गाउँपालिकामा प्रमुख प्रशासकीय अधिकृत खटाएको थियो।

तर सिद्धलेक गाउँपालिकाका अध्यक्ष परशुराम खतिवडाले नयाँ प्रमुख प्रशासकीय अधिकृतलाई हाजिर गराउन नसक्ने भन्दै मन्त्रालयमा पत्र पठाउनुभएको छ ।

गाउँपालिकाका प्रमुख प्रशासकीय अधिकृत विनोद कुमार अधिकारीको सरुवा भएपछि रिक्त हुन आएको प्रमुख प्रशासकीय अधिकृतमा केही दिन अघिमात्रै पालिकामा कार्यरत आठौं तहका शाखा अधिकृत अधिकारीलाई कार्यालयको आर्थिक तथा प्रशासनिक कार्य हेर्ने जिम्मेवारी तोकिएको भन्दै अध्यक्ष खतिवडाले नयाँ प्रमुख प्रशासकीय अधिकृत हाजिर नगराउने पत्र लेखेर मन्त्रालयलाई पठाएपछि यो बिषय विवादमा परेको छ ।

अध्यक्ष खतिवडाले २०८१/५/२४ को मितिमा संघीय मामिला तथा सामान्य प्रशासन मन्त्रालयलाई पत्र लेखेर पठाउनुभएको छ ।

पत्रमा अध्यक्षले लेख्नुभएको छ, गाउँ कार्यपालिकाको मिति २०८९/०४/३१ को वैठकको निर्णय तथा यस गाउँपालिकाको च.नं. २११ मिति २०८९/०५/१७ को सिफारिश पत्रबमोजिम तहाँ मन्त्रालयको च.नं. ४०२ मिति २०८९/०५/१७ को पत्रानुसार कर्मचारी समायोजन ऐन, २०५५ बमोजिम सरकारी सेवाबाट स्थानीय तहको सेवामा समायोजन भई हाल यस कार्यालयमा कार्यरत रहनुभएको प्रशासन सेवा, सामान्य प्रशासन समूहका वरिष्ठ शाखा अधिकृत, अधिकृतस्तर आठ श्री शिवराम अधिकारी (क.सं.नं.– २०८५५०) लाई यस कार्यालयको आर्थिक तथा प्रशासनिक कार्य गर्ने गरी जिम्मेवारी तोकिएको र निजले उक्त जिम्मेवारी कुशलतापूर्वक निर्वाह गरिरहेको हुँदा यस गाउँपालिकामा अर्को प्रमुख प्रशासकीय अधिकृत खटाउन आवश्यक नरहेको र समन्वय नगरी खटाईएको अवस्थामा यस कार्यालयमा हाजिर गराउन नसिकने व्यहोरा अनुरोध छ ।

यता वडा नम्बर १ का वडाअध्यक्ष पेमा लामाले भने सामाजिक सञ्जालबाट सार्वजनिक गर्दै यस बिषयमा कार्यपालिका भित्र कुनै छलफल र निर्णय नभएको वताउनुभएको छ ।

उहाँले लेख्नुभएको छ, हाम्रो सिद्धलेक गा.पाको २०८१/०३/३० गाउँ सभा पछि हाल सम्म कुनै पनि कार्यपालिकाको बैठकको जानकारी नभएको तर तल उल्लेखित मिति २०८१/०४/३१ मितिको बैठक कहाँ र कुन पालिकामा भएको निर्णय हो ? थाहा हुनेहरु जानकारी पाऊँ ।

निमित्त प्रमुख प्रशासकीय अधिकृतको जिम्मेवारी पाउनुएको शिवराम अधिकारीले आफ्नो पद अघि निमित्त समेत नलेखी प्रमुख प्रशासकीय अधिकृत लेखेर पदिय दुरुपयोग गरेको पाईएको छ ।

अधिकारी स्थानीय सेवाको कर्मचारी भएकोले प्रमुख प्रशासकीय अधिकृत बन्न पाँउदैनन्, प्रमुख प्रशासकीय अधिकृत संघीय कर्मचारी हुनुपर्छ ।

सहसचिवको दरबन्दी भएको स्थानीय तहमा प्रमुख प्रशासकीय अधिकृत खटाउँदा नेपाल सरकार, मन्त्रिपरिषद्बाट व्यवस्था भए बमोजिम हुने भनिएको छ । अहिले यिनै अभ्यासहरु चलिआएका छन् ।

अहिले पनि महानगरपालिका तथा उपमहानगरपालिकामा नेपाल प्रशासन सेवाका राजपत्राकिंत प्रथम श्रेणीको कर्मचारी (सहसचिव), नगरपालिकामा द्वितीय श्रेणीका कर्मचारी (उपसचिव), गाउँपालिकामा तृतीय श्रेणीका कर्मचारी (शाखा अधिकृत)लाई खटाउने गरिएको छ ।

मन्त्रालयले स्थानीय तहको स्वीकृत दरवन्दी तोके बमोजिम प्रमुख प्रशासकीय अधिकृत तत्काल खटाउन नसकिने भएमा एक श्रेणी मुनिको पदमा कम्तीमा ५ वर्ष अनुभव भएको प्रशासन समूहको अधिकृतस्तरको कर्मचारीलाई प्रमुख प्रशासकीय अधिकृतको रुपमा खटाउने छ । यसरी खटाउँदा स्थानीय तहमा कार्यरत कर्मचारीभन्दा कनिष्ठ कर्मचारी नखटाउने मापदण्डमा प्रस्ताव गरिएको छ ।

यस्तै पालिका अध्यक्ष खतिवडाले भदौ २४ को मितिमा मन्त्रालयलाई पत्र पठाएको देखिएपनी पत्र भदौ २८ गते तयार पारिएको खुलेको छ ।

भदौ २७ मा मन्त्रालयले होमनाथ दहाललाई प्रमुख प्रसासकिय अधिकृतको जिम्मेवारी दिएर पठाएपछि अध्यक्ष र निमित्त प्रमुख प्रशासकिय अधिकृत अधिकारीले पुरानो मितिमा पत्र लेखेर पठाएको खुलासा भएको एक स्रोतले जनाएको छ ।

अध्यक्ष खतिवडाले हस्ताक्षर गरेपनी पत्र लेख्ने काम भने अधिकारीले गरेको समेत खुल्न आएको छ ।

पालिकामा एमालेको दोहोरो भूमिकाले समस्या उत्पन्न भएको स्रोतले बताएको छ।एमालेका वडाअध्यक्षहरु अध्यक्षसँग मिलेर अधिकारीलाई प्रमुख प्रसासकिय अधिकृत बनाउन लागेका छ्न भने एमालेको जिल्ला नेतृत्व र काङ्ग्रेसका वडाअध्यक्षहरु अधिकारीको विपक्षमा देखिएका छन्।