पूर्वसूचना हुँदा पनि सवारी सन्चालनमा प्रशासनले रोक नलगाएको गृहको निष्कर्ष, धादिङ र काभ्रेका सीडीओ गृह तानिए

अडियोमा सुन्नुहोस

काठमाडौं । धादिङ र काभ्रे जिल्लाका प्रमुख जिल्ला अधिकारी परिवर्तन भएको छ ।

गृह मन्त्रालयले धादिङमा गृह मन्त्रालयका सहसचिव सुमन घिमिरेलाई र काभ्रेमा उमेश ढकाललाई प्रमुख जिल्ला अधिकारी बनाएर पठाएको छ ।

यसअघि धादिङमा राजेन्द्रदेव पाण्डे र काभ्रेमा सूर्य प्रसाद सेढाइँ प्रमुख जिल्ला अधिकारी हुनुहुन्थ्यो ।उहाँहरुलाई गृहमन्त्रालयमा तानिएको गृह मन्त्रालयका प्रवक्ता ऋषिराम तिवारीले जानकारी दिनुभयो ।

मनसुन सक्रिय भएसँगै जोखिमको पूर्वसूचना हुँदाहुँदै सवारी साधन सन्चालनमा प्रशासनले रोक नलगाउँदा धेरै क्षति भएको गृह मन्त्रालयको निष्कर्ष छ ।

मौसम पूर्वानुमान महाशाखाले बेलैमा गराएको सचेतना र सञ्चारमाध्यमबाट त्यसको व्यापक प्रचार प्रसार हुँदाहुँदै सयौँ सवारीसाधन र यात्रुलाई राजमार्गमा निस्किन अनुमति दिँदा मानवीय क्षति धेरै भएको गृहको भनाई छ ।

नागढुङ्गा–नौबिसे सडकखण्ड (त्रिभुवन राजपथ) अन्तरगत धुनिबेसी नगरपालिका-९ झ्याप्लेखोलामा पहिरो खसेर सवारी साधनसहित पुरिदा ३५ जनाको मृत्यु भइसकेको नेपाल प्रहरीले जनाएको छ।

यसैगरी काभ्रेमा पनि बाढी र पहिरोबाट ५० जनाको मृत्यु भएको नेपाल प्रहरीको तथ्यांक छ।

तस्विर:जिल्ला प्रशासन कार्यालय धादिङ