धादिङमा एसईईको सम्पूर्ण तयारी पूरा,पाँच हजार ३८९ परीक्षार्थी सहभागी हुँदै

धादिङ,१६ चैत ।
भोलि शुक्रबारदेखि सुरु हुने माध्यमिक शिक्षा परीक्षा(एसईई)को सम्पूर्ण तयारी पूरा भएको छ ।

यसबर्षको परीक्षामा धादिङबाट ५ हजार ३ सय ८९ परीक्षार्थी सहभागी हुने भएका छन् ।धादिङमा यस वर्ष नियमित तर्फ ५ हजार ८७ जना, प्राविधिक तर्फ २ सय ४७ जना र ग्रेडवृद्धि तर्फ ५५ गरी जम्मा ५ हजार ३ सय ८९ जना विद्यार्थीहरु परीक्षामा सहभागी हुने शिक्षा विकास तथा समन्वय इकाई धादिङका इकाई प्रमुख राजेन्द्र बहादुर क्षेत्रीले बताउनुभयो ।

परिक्षाका लागि जिल्लाको १३ वटै पालिकामा २६ वटा परीक्षा केन्द्र र केन्द्राध्यक्ष तोकिएको छ । जिल्लाभर १७८ मावि बिद्यालय रहेकोमा सबैभन्दा कम रुवी भ्यालीको मुक्रावदेवी मावि सेर्तुङको परिक्षा केन्द्रमा तिन विद्यालय समावेश भएको छ भने सबैभन्दा बढि गजुरीको आदर्श मावि परिक्षा केन्द्रमा १२ विद्यालय रहेको छ ।

त्यस्तै धुनिवेशीको मच्छिन्द्र मावि नौविसेको परिक्षा केन्द्रमा १० विद्यालय रहेको छ । परीक्षालाई शान्तिपुर्ण रुपले सम्पन्न गर्नका लागि कटिवद्ध रहेको धादिङका ईकाई प्रमुख क्षेत्रीले बताउनुभयो ।

परीक्षा बिहान ८ बजेदेखि सुरु हुनेछ । प्रदेशस्तरमा अनिवार्य विषयका प्रश्नपत्रको समानान्तर सेट तयार गरिएको छ । कठिनाइ स्तर एउटै भए पनि हरेक प्रदेशमा फरक प्रश्न सोधिने छ।

यस वर्षको परीक्षामा देशभर ५ लाख १६ हजार ५ सय ९१ परीक्षार्थी सहभागी हुने भएका छन्। २ लाख ६० हजार ६ सय ७४ छात्र र २ लाख ५५ हजार ९ सय १७ छात्रा एसईई परीक्षामा सहभागी हुने परीक्षा नियन्त्रक विष्णुनारायण श्रेष्ठले बताउनुभयो ।

परीक्षाका लागि आवश्यक उत्तरपुस्तिका सबै परीक्षा केन्द्रमा र प्रश्नपत्र सुरक्षा केन्द्रहरुमा पठाइसकिएको छ ।यस वर्ष जापानबाट पनि १४ परीक्षार्थीहरु एसईईमा सहभागी हुने राष्ट्रिय परीक्षा बोर्डले जनाएको छ ।

वैदेशिक रोजगारीमा रहेका नेपालीका छोराछोरीहरुले जापान सरकारको अनुमति लिएर जापानबाटै परीक्षा दिन लागेका परीक्षा नियन्त्रक श्रेष्ठले जानकारी दिनुभयो ।

एसईई परीक्षाका लागि ७७ जिल्लामा २ हजार ३६ परीक्षा केन्द्र निर्धारण गरिएको छ। सबैभन्दा बढी परीक्षा केन्द्र बागमती प्रदेशमा छन् । बागमती प्रदेशका १ लाख ६ हजार ९ सय ५९ परीक्षार्थीका लागि ४ सय ३४ परीक्षा केन्द्र तोकिएको छ ।

भोलि देखी सुरु हुने उक्त परीक्षा चैत २९ गतेसम्म सञ्चालन हुनेछ । पुरानो पाठ्यक्रम अनुसारको यो वर्ष अन्तिम परीक्षा हो । आगामी २०८० सालदेखि नयाँ पाठ्यक्रममा आधारित परीक्षा सञ्चालन हुनेछ।