धादिङमा लागू पदार्थ सेवन गरी सवारी चलाउने दुई चालक पक्राउ

धादिङ । लागू पदार्थ सेवन गरी सवारी साधन चलाएको आरोपमा दुई जना चालकलाई धादिङ प्रहरीले पक्राउ गरेको छ।

गल्छी गाउँपालिका-६ बैरेनी बजारस्थित बैरेनी अस्पताल प्रालिको सहयोगमा पृथ्वी राजमार्गमा सञ्चालन हुने सार्वजनिक सवारी साधनका चालकहरूको लागू पदार्थ सेवन परीक्षणका क्रममा लागू पदार्थ सेवन गरी सवारी साधन चलाएको पुष्टि भएपछि दुई जना चालकलाई पक्राउ गरिएको जिल्ला प्रहरी कार्यालय धादिङका निमित्त सूचना अधिकारी श्याम कुमार बस्नेतले जानकारी दिनुभयो ।

पक्राउ पर्नेमा भैरहवाबाट काठमाडौंतर्फ आउँदै गरेको लु १ क ४९०३ नम्बरको ट्रकका चालक नवलपुरको मध्यविन्दु नगरपालिका-६ निवासी ४१ वर्षीय कर्णबहादुर थापा र काठमाडौंबाट लमजुङतर्फ जाँदै गरेको बा प्र ०१-०२८ च १९२३ नम्बरको सुमोका चालक लमजुङको बेँसीसहर नगरपालिका-१ निवासी २५ वर्षीय सचिन परियार रहेका छन्।

प्रहरीले उनीहरूलाई लागू औषध नियन्त्रण ऐन, २०३३ बमोजिम पक्राउ गरी असार १९ गते जिल्ला अदालत धादिङमा उपस्थित गराएको जनाएको छ।

अदालतबाट आठ दिनको म्याद थप अनुमति प्राप्त भएपछि इलाका प्रहरी कार्यालय गजुरीबाट थप अनुसन्धान भइरहेको छ।

प्रहरीका अनुसार धादिङ जिल्लामा चैत महिनादेखि हालसम्म लागू पदार्थ सेवन गरी सवारी साधन चलाएको अवस्थामा २३ जना चालक पक्राउ परेका छन्। उनीहरूविरुद्ध मुद्दा दर्ता गरी कानुनी कारबाही प्रक्रिया अगाडि बढाइएको प्रहरीले जनाएको छ।