नलाङका दुई वटा सडक धमाधम कालोपत्रे (भिडियो सहित)

अडियोमा सुन्नुहोस

धादिङ । सिद्धलेक गाउँपालिकाको वडा नं १ भित्रका दुई वटा सडक धमाधम कालोपत्रे भइरहेका छन् ।हाल २ वटा सडकमा झण्डै ३ किलोमिटर कालोपत्रे गर्ने गरि काम भइरहेको वडा नं १ का वडाध्यक्ष पेमा लामाले बताउनुभयो ।

लामाका अनुसार अहिले नलाङ र सलाङ जोड्ने मुख्य मार्गका रुपमा रहेको बैरनी–पिपलनलाङ–ठाँटी–कमलबारीसम्मको १ दशमलब चार सय किलोमिटर सडक स्तरोन्नति गरि कालोपत्रे गर्ने कार्य तीव्र गतिमा भइरहेको छ ।

यता डुम्रेखोला–छापगाउँ–हटिया–वडा नं १ को कार्यालय हुँदै वडा नं २ जोड्ने सडकको १ दशमलब ४४० किलोमिटर पनि कालोपत्रे गर्ने कार्य तीव्र गतिमा भइरहेको छ ।

यो सडकको दुई खण्डमा छुट्टाछुट्टै सम्झौता अनुसार एउटा ९ सय मिटरको र एउटा ५ सय ४० मिटरको ५ मिटर चौडामा कालोपत्रे भईरहेको वडाध्यक्ष लामाले बागमती कलमलाई बताउनुभयो ।

उहाँले भन्नुभयो,‘एक खण्डको कालोपत्रेको लागि आर्थिक बर्ष २०८०/०८१ को योजना अनुसार बागमती प्रदेश सरकार र सिद्धलेक गाउँपालिकाको समपुरक बजेट एक करोड २२ लाख ९३ हजार २०८ लागतमा २०८० माघ १४ गते निभा विल्र्डस एण्ड सप्लायर्स प्रा.लिसँग सम्झौता भएको र अर्को खण्डको बागमती प्रदेशको भौतिक पूर्वाधार विकास मन्त्रालय अन्तरगत प्रादेशिक सडक डिभिजन कार्यालयद्धारा विनियोजित एक करोड २० लाख ४ हजार ३७० लागतमा २०८० मंसिर २ गते एच.बि ईन्ट्राटेक प्रा.लिसँग सम्झौता भएको थियो ।’

जेठ मसान्तसम्म सम्पन्न गर्नुपर्ने सम्झौता अनुसार करीव ८० प्रतिशत काम सम्पन्न भईसकेकोले यो सडकको काम तोकिएकै समयमा पुरा हुने वडाध्यक्ष लामाको भनाई छ । यो सडक डुम्रेखोला देखी वडा नं १ को कार्यालयसम्म ५ दशमलब ३ किलोमिटर रहेको छ ।

बैरनी–पिपलनलाङ–ठाँटी–कमलबारीसम्मको एक किलोमिटर चार सय मिटर सडक कालोपत्रेका लागि पनि २०८० साल माघ २३ मा सम्झौता भएको थियो ।

१ करोड ९५ लाख ५९ हजार रुपैयाँ सम्झौता रकम रहेको उक्त सडक खण्डमा पनि ८० प्रतिशत काम सम्पन्न भईसकेको वडाध्यक्ष लामाले जानकारी दिनुभयो । यही जेठ मसान्त भित्र सक्ने गरी उक्त सडक कालोपत्रेको जिम्मेवारी नेशन श्री बाराही जे.भि ले पाएको छ ।

यो सँगै १८ किलोमिटर रहेको बैरनी–पिपलनलाङ–ठाँटी–कमलबारीसम्मको सडक ६ मिटर चौडामा झण्डै ६ किलोमिटर कालोपत्रे भईसकेको छ ।

आफ्नो कार्यकालमा वडा नं १ भित्रको मुख्य सडक कालोपत्रे गर्ने लक्ष्य रहेको वडाध्यक्ष लामाको भनाई छ । अहिले वडा भित्रको सम्पूर्ण सडक १२ महिना निर्बाध रुपमा सवारी चल्ने गरी स्तोरन्नती गरिएको र हरेक गाउँमा पुग्ने सहायक सडकहरु समेत बनिसकेकोले सडकको पहुँचमा सबै बस्तीहरु पुगेको बताउनुभयो ।

यता बैरनी–अर्चले–तारनलाङ–ठाँटी सडक अन्तरगत लामोघर चोकबाट वडा नं २ जोड्ने सडकको पनि करिब ९ सय मिटर कालोपत्रेका लागि आर.डि.एस निर्माण सेवासँग सम्झौता भएको छ ।

२०८० साल माघ ३ गते बागमती प्रदेश सरकार र सिद्धलेक गाउँपालिकाको समपुरक बजेट कुल १ करोड २६ लाख ५६ हजार ५ सय १० रुपैयाँमा यही जेठ मसान्त भित्र सक्ने गरी सम्झौता भएको भएपनि कालोपत्रेको काम अघि बढ्न सकेको छैन् ।

कालोपत्रेसहित वडाध्यक्ष लामा सँगको कुराकानी हेर्न तलको भिडियो किल्क गर्नुहोस् :