मिसन ग्रासरुट अभियानलाई आगामी निर्वाचनसम्म निरन्तरता दिनुपर्नेमा जोड

धादिङ,०५ बैशाख।
नेकपा एमाले निलकण्ठ नगर कमिटिका कार्यकर्ताहरुले मिसन ग्रासरुट अभियानलाई निर्वाचनसम्म निरन्तरता दिनुपर्नेमा जोड दिएका छन् ।

अभियानले कार्यकर्ता माझ नयाँ उत्साह र तरंग ल्याएकोले आगामी निर्वाचनसम्म निरन्तरता हुनुपर्ने जोड दिएका हुन् । नेकपा एमाले धादिङको मिसन ग्रासरुट अभियान अन्तर्गत निलकण्ठ नगरकमिटिको नगर स्तरीय समिक्षा बैठकमा कार्यकर्ताहरुले पार्टीलाई सुदृढ बनाउन यो अभियान प्रभावकारी भएको बताएका हुन् ।

नेकपा एमाले केन्द्रिय कमिटी सदस्य कैलाश ढुंङ्गेलको प्रमुख आतिथ्यतामा मंगलबार सप्पन्न भएको कार्यक्रममा फागुन १० गतेदेखि शुरु भएको दुई महिने मिसन ग्रासरुट अभियानको निलकण्ठ नगरपालिका भित्रको १४ वटै वडामा भएको गतिविधिको समिक्षा गरिएको छ ।

निलकन्ठ नगरपालिकाको १४ वटै वडामा वडा भेलाहरु गरिएको,टोलि टोलमा टोल कमिटी गठन गरिएको , किसान , युवा ,महिला , विद्यार्थी ,जनजाती लगायतका जनवर्गीय संगठनहरु निर्माण गरिएको प्रतिवेदन वडा कमिटीका अध्यक्षहरुले पेश गर्नुभयो ।

नेकपा एमाले बागमती प्रदेश कमिटी सदस्य नरेश खतिवडाले मिसन ग्रासरुट अभियानमा निलकण्ठको १४ वटै वडामा पुग्दा कार्यकर्ताहरुले निर्वाचनको समय बाहेक नेता कहिल्यै गाउँ नफर्किने गुनासो गरेकोमा यस पटक केन्द्रीय नेता घर घरमा भेट्न पाएर खुशी प्रकट गरेको बताउनुभयो ।

कार्यक्रममा बोल्नुहुँदै एमाले केन्द्रीय सदस्य ढुंङ्गेलले अहिलेको दुई महिने मिसन ग्रासरुट अभियानले नेकपा एमालेको तल्लोतहमा रहेको समस्या र गुनासा पहिचान गर्न मद्दत गरेको बताउनुभयो ।

धेरै कार्यकर्तामा नयाँ तरंग ल्याएकोले यस अभियानलाई जिल्ला र नगर कमिटीले निरंतरता दिनुपर्ने आवश्यकता औंल्याउनुभयो । युवा पुस्ताहरुमा नेकपा एमालेको निति बिचार र सिद्धान्त पुर्याउन जरुरी रहेको बताउनुभयो ।

अरु पार्टी भन्दा नेकपा एमाले के कारणले फरक छ भन्ने बुझाउन जरुरी रहेकोले त्यो जिम्मेवारी जिल्ला कमिटीका नेताहरूको भएको बताउनुभयो । कार्यक्रम निलकन्ठ नगर कमिटीका अध्यक्ष हरि बहादुर श्रेष्ठको अध्यक्षतामा भएको नगर कमिटीका सचिव बेग बहादुर सुनारले जानकारी दिनुभयो ।