धादिङबेशीमा नेपोनको शुभकामना आदानप्रदान कार्यक्रम

धादिङ । नेपाल राष्ट्रिय भूतपूर्व सैनिक तथा प्रहरी संगठन (नेपोन) धादिङ जिल्ला कामिटीले शुभकामना आदानप्रदान कार्यक्रम आयोजना गरेको छ ।

नेपालीहरुको महान चाड बिजया दशमी, शुभ दिपावली, नेपाल सम्वत तथा छठ पर्वको अवसरमा नेपोनले शुक्रबार धादिङबेशीस्थित मदन आसृत स्मृति भवनमा शुभकामना आदानप्रदान कार्यक्रम तथा बडाखाना कार्यक्रम आयोजना गरेको हो।

कार्यक्रममा नेपोनका केन्द्रिय अध्यक्ष बिनोद पाण्डेले नेकपा एमालेको भरप्रदो जनसंगठ्न भनेकै नेपोन रहेको बताउनुभयो।

नेपोनलाइ जनताको बीचमा फैलाएर लैजानुपर्ने भन्दै उहाँले यसलाई अझै शक्तिशाली बनाएर लैजान आग्रह गर्नुभयो।

भूतपूर्व सैनिक तथा प्रहरीहरु तालिम प्राप्त सिपाही भएकोले देशलाई अप्ठेरो पर्दा सहयोगको लागि तत्पर रहेको पनि बताउनुभयो।

उहाँले देशलाई अप्ठेरो परेको जुन सुकै बेला सहयोग गर्न तयार रहेको स्पष्ट पार्नुभयो।उहाँले जनताको सुखदुखमा लाग्दै राष्ट्रिय सुरक्षामा भूतपूर्व सैनिक प्रहरी संगठनले संगठनमा आवद्ध भएर काम गर्ने बताउनुभयो ।

यस्तै नेकपा एमाले पोलिटव्यूरो सदस्य तथा नेपाल राष्ट्रिय भूतपूर्व सैनिक तथा प्रहरी संगठन (नेपोन)का पार्टी इन्चार्ज खेममान खड्काले देशको सिमा रक्षा र जनताको सुरक्षामा लाग्ने संगठनले बडा खाना कार्यक्रम गरेर देशमै नयाँ कामको सुरुवात गरेको बताउनुभयो ।

नेपोन धादिङका अध्यक्ष रेशमबहादुर भण्डारीको अध्यक्षतामा भएको कार्यक्रममा एमालेका केन्द्रिय सदस्य तथा एमाले धादिङका इन्चार्ज खेम लोहनी,एमाले धादिङका अध्यक्ष भुमी त्रिपाठी,संगठन उपमहासचिव मदन केसी, नेकपा एमाले जिल्ला सचिव राधिका सापकोटा, नेपाल राष्ट्रिय भूतपूर्व सैनिक तथा प्रहरी संगठनका केन्द्रीय सदस्य तथा जिल्ला इन्चार्ज गोकुल अधिकारी, जिल्ला सल्लाहकार उत्तम अधिकारी कार्यसमितिका कोषाध्यक्ष सुब्बा श्रेष्ठ लगायतले शुभकामना दिँदै भूतपूर्व सैनिक प्रहरी संगठनको योगदानको चर्चा गर्नुभएको थियो ।

विविध साँस्कृतिक कार्यक्रम समेत आयोजना गरिएको शुभकामना तथा बडाखाना कार्यक्रममा जिल्लाभरका भूतपूर्व प्रहरी तथा सैनिकहरुको उल्लेख्य सहभागिता रहेको थियो ।

प्रहरी तथा सेनाको व्यारेकमा छँदा हुने बडाखाना कार्यक्रमले विदाको समयमा डिउटीमा खटिएकालाई उत्साह भर्ने र घर जानेलाई विदाइ गर्दै खाना खुवाउने चलनको झल्को दिनेगरि कार्यक्रम आयोजना भएको थियो ।