बजार अनुगमन : धादिङबेशीका चार पसललाई जरिवाना

धादिङ। जिल्ला अनुगमन समिति धादिङले चाडपर्वलाई लक्षित गरी बजार अनुगमनलाई तिव्र पारेको छ।

चाडपर्वको समयमा उपभोक्ता ठगिन सक्ने सम्भावना बढ्ने भएकाले समितिले आइतबार सदरमुकाम धादिङबेशीस्थित निलकण्ठ नगरपालिका–३ र ८ मा सञ्चालित खाद्यान्न, तरकारी पसल तथा होटलहरुको अनुगमन गरेको छ ।

अनुगमनको क्रममा वडा नं. ८ को गुप्ता सप्लायर्सलाई ५ हजार र वडा नं.३ को पोखरेल किराना पसललाई ५ हजार, तुलसी सप्लायर्सलाई १५ हजार रुपैयाँ र एवान मिठाई एण्ड खाजा घरलाई १५ हजार रुपैयाँ जरिवाना तिराईएको छ ।

उपभोक्तालाई झुक्याएर म्याद गुज्रिएका सामान बिक्री गर्ने, अखाद्य बस्तुमा रङ प्रयोग गर्ने, पसलमा सरसफाइ नहुने, खरिद–बिक्रीमा बिल प्रयोग नगर्ने तथा आवश्यक मापदण्ड पूरा नगरी सञ्चालन गरेका कारण यी पसललाई कारबाही गरिएको जिल्ला बजार अनुगमन समिति धादिङका संयोजक तथा उद्योग वाणिज्य कार्यालय धादिङका प्रमुख चुडामणी पुरीले जानकारी दिनुभयो।

अनुगमनलाई निरन्तरता दिईने र उपभोक्ताको हकहित सुरक्षित गर्ने कार्यलाई प्राथमिकता दिने उहाँको भनाई छ।