डिजेल र मट्टितेलको मुल्य घट्दा पेट्रोलको मुल्य बढ्यो

काठमण्डौ । डिजेल र मट्टितेलको मुल्य घट्दा पेट्रोलको मुल्य बढेको छ ।नेपाल आयल निगमले गएरातिदेखि लागू हुने गरी डिजेल र मट्टितेलको मूल्य घटाएको हो भने पेट्रोलको मूल्य बढाएको छ ।

इण्डियन आयल कर्पोरेशनबाट हिजो प्राप्त पेट्रोलियम पदार्थको नयाँ खरिद मूल्यअनुसार डिजेल र मट्टितेलमा प्रतिलिटर ६ रुपैयाँ ९३ पैसा घटेर तथा पेट्रोलमा १ रुपैयाँ ९४ पैसा बढेर आएकाले खुद्रा बिक्री मूल्य समायोजन गरिएको निगमले जनाएको छ।

निगमले हवाई इन्धन र खाना पकाउने ग्याँसको मूल्य भने यथावत राखेको छ ।

मूल्य समायोजनसँगै डिजेल र मट्टितेल पहिलो वर्ग चारआली, विराटनगर, जनकपुर, अमलेखगञ्ज, भलबारी, नेपालगन्ज, धनगढी र वीरगञ्जका लागि प्रतिलिटर १ सय ३९ रुपैयाँ ५० पैसा, दोस्रो वर्ग सुर्खेत र दाङका लागि १ सय ४१ रुपैयाँ र तेस्रो वर्ग काठमाडौँ, पोखरा र दिपायलका लागि १ सय ४२ रुपैयाँ कायम भएको छ ।

त्यसैगरी पेट्रोल पहिलो वर्गका लागि प्रतिलिटर १ सय ६० रुपैयाँ ५० पैसा, दोस्रो वर्गका लागि १ सय ६२ रुपैयाँ र तेस्रो वर्गका लागि १ सय ६३ रुपैयाँ तोकिएको छ ।

निगमले चारआली, विराटनगर, जनकपुर, अमलेखगञ्ज, भलबारी, नेपालगन्ज, धनगढी र वीरगञ्ज डिपोलाई पहिलो वर्ग, सुर्खेत र दाङ डिपोलाई दोस्रो वर्ग र काठमाण्डौ, पोखरा र दिपायल डिपोलाई तेस्रो वर्गमा राखेको छ ।

निगमको डिपोदेखि १५ किलोमिटरसम्मका लागि यो खुद्रा बिक्री मूल्य लागू हुने जनाइएको छ ।