धादिङमा निर्वाचनको सम्पूर्ण तयारी पूरा, मत गणना स्थलमा तारजाली र सीसी क्यामेरा जडान

धादिङ । भोलि फागुन २१ गते हुने प्रतिनिधि सभा सदस्य निर्वाचनका लागि धादिङ जिल्लाभर सम्पूर्ण तयारी पूरा भएको छ।

जिल्लाका सम्पूर्ण मतदान केन्द्रमा आवश्यक सामग्री तथा कर्मचारी खटाइसकिएको जिल्ला निर्वाचन कार्यालयले जनाएको छ।

मतदानस्थलहरू पूर्ण रूपमा तयार अवस्थामा रहेको र तोकिएको समयमै बिहानबाट मतदान प्रक्रिया सुरु हुने जिल्ला निर्वाचन अधिकारी शिव बहादुर गुरुङले जानकारी दिनुभयो।

मतदान स्थलमा कुनै अवरोध नआउने विश्वास व्यक्त गर्दै उहाँले मतदातालाई निर्धक्क भएर मतदानमा सहभागी हुन आग्रह गर्नुभयो।

मतदान सम्पन्न भएपछि सबै क्षेत्रका मतपेटिका सम्बन्धित मतगणना केन्द्रमा सुरक्षित रूपमा संकलन गरिने व्यवस्था मिलाइएको छ।

यद्यपि, धादिङ क्षेत्र नम्बर २ का केही भौगोलिक रूपमा दुर्गम स्थानबाट मतपेटिका ल्याउन भने केही ढिलाइ हुन सक्ने अनुमान गरिएको छ।

मतगणनाका लागि आवश्यक पूर्वतयारी समेत पूरा भइसकेको छ।

गणना स्थलमा कडा सुरक्षा प्रबन्ध मिलाइएको छ भने तारजालीसहित सीसी क्यामेरा जडान गरिएको छ।

मतपेटिका संकलन भएपछि सर्वदलीय बैठक बसालेर तत्कालै मतगणना सुरु गरिने जनाइएको छ।

मतगणना छिटो, पारदर्शी र व्यवस्थित बनाउन पर्याप्त जनशक्ति परिचालन गरिएको कार्यालयले जनाएको छ।

गणना सुरु भएको २४ घण्टाभित्र अन्तिम परिणाम सार्वजनिक गर्ने लक्ष्य राखिएको छ।