प्रतिनिधि सभा उम्मेदवारले बुझाउन थाले निर्वाचन खर्च : धादिङका आशिकाको १६ र बोध नारायणको २६ लाख

धादिङ । प्रतिनिधि सभा सदस्य निर्वाचनमा सहभागी उम्मेदवारहरूले निर्वाचन आयोगमा आफ्नो चुनावी खर्च विवरण बुझाउने क्रम बढेको छ ।

निर्वाचनमा पारदर्शिता कायम गर्न आयोगले तोकेको आचारसंहिता र कानुनी व्यवस्थाअनुसार उम्मेदवारहरूले धमाधम विवरण पेस गर्न थालेका हुन् ।

यसै क्रममा धादिङ क्षेत्र नम्बर १ र २ को रास्वपाका उम्मेदवारहरु आशिका तामाङ र बोध नारायण श्रेष्ठले पनि आफ्नो निर्वाचन खर्च विवरण सार्वजनिक गरेका छन्।

धादिङ क्षेत्र नम्बर १ को आशिका तामाङले आफ्नो चुनावी अभियानका क्रममा कुल १६ लाख २९ हजार ४९५ रुपैयाँ खर्च गरिएको जिल्ला निर्वाचन कार्यालय धादिङमा पेश गरेका छन्।

जसअनुसार मनोनयन दर्ता शुल्कमा ५ हजार रुपैयाँ, प्रचार–प्रसार सामग्रीमा ८ लाख ४६ हजार रुपैयाँ, छपाइ तथा मतदाता सम्बन्धी सामग्रीमा २ लाख ८५ हजार १३० रुपैयाँ खर्च गरिएको छ।

त्यस्तै खाना तथा खाजा खर्चमा १ लाख २३ हजार ११५, गाडी तथा इन्धन खर्चमा ३ लाख ४७ हजार २५० र स्टाम्प तथा स्टेशनरी खर्चमा २३ हजार रुपैयाँ खर्च भएको विवरणमा उल्लेख गरिएको छ।

त्यसैगरी धादिङ क्षेत्र नम्बर २ का उम्मेदवार बोध नारायण श्रेष्ठले आफ्नो चुनावी अभियानका क्रममा कुल २६ लाख ३० हजार ३८३ रुपैयाँ खर्च गरिएको जिल्ला निर्वाचन कार्यालय धादिङमा पेश गर्नुभएको छ ।

प्रस्तुत विवरणअनुसार सबैभन्दा बढी इन्धन तथा सवारी भाडामा रकम खर्च गरिएको छ, जसमा करिब ७ लाख २४ हजार १८० रुपैयाँ खर्च भएको उल्लेख छ।

त्यसैगरी प्रचार-प्रसार तथा विज्ञापनतर्फ ४ लाख ५५ हजार ९०९ रुपैयाँ खर्च गरिएको देखिन्छ।

अन्य शीर्षकअन्तर्गत खाना, खाजा तथा पानीमा करिब ४ लाख ३१ हजार १९७ रुपैयाँ, सञ्चार तथा सामाजिक सञ्जालमा २ लाख ५५ हजार १२२ रुपैयाँ, र छपाइ स्टेसनरीमा २ लाख ७ हजार ७७५ रुपैयाँ खर्च भएको विवरणमा उल्लेख गरिएको छ।

यस्तै, पालिका तथा वडा तहमा कार्यालय व्यवस्थापनमा करिब ४ लाख ७० हजार रुपैयाँ, मतदाता नामावली प्रिन्टमा करिब ७३ हजार २०० रुपैयाँ, मतदाता नामावली खरिदमा ३ हजार रुपैयाँ, तथा मनोनयन दर्ता शुल्कबापत १० हजार रुपैयाँ खर्च भएको जनाइएको छ।

यसअघि धादिङ-२ मा उम्मेदवार रहनुभएका नेपाली कांग्रेसका रमेश प्रसाद धमलाले आफ्नो चुनावी खर्च विवरण सार्वजनिक गर्नुभएको थियो । चुनावी अभियानका क्रममा धमलाले १३ लाख ८९ हजार १२ रुपैयाँ ४० पैसा खर्च भएको निर्वाचन कार्यालय धादिङमा खर्च विवरण पेश गर्नुभएको थियो ।

फागुन २१ गते भएको निर्वाचनमा धादिङ-१ मा राष्ट्रिय स्वतन्त्र पार्टीकी उम्मेदवार आशिका तामाङ ३९ हजार १२८ मतसहित विजयी हुनुभएको थियो भने क्षेत्र नम्बर २ मा बोधनारायण श्रेष्ठले २६ हजार ९४५ मतसहित विजयी हुनुभएको थियो ।

निर्वाचन आयोगले प्रतिनिधि सभा सदस्य निर्वाचनमा सहभागी राजनीतिक दल र उम्मेदवारलाई निर्वाचन प्रचारप्रसारका क्रममा भएको आम्दानी तथा खर्चको विवरण ३५ दिनभित्र सार्वजनिक गर्न निर्देशन दिइसकेको छ ।

प्रतिनिधि सभा सदस्य निर्वाचन ऐन, २०७४ को दफा ७२ को उपदफा (४) बमोजिम पहिलो हुने निर्वाचित हुने प्रणालीतर्फका उम्मेदवारले सम्बन्धित जिल्ला निर्वाचन कार्यालयमा र समानुपातिकतर्फका राजनीतिक दलले आयोगले तोकेको ढाँचामा खर्च विवरण पेस गर्नुपर्ने कानुनी व्यवस्था छ ।

यस्तै, निर्वाचन (कसूर तथा सजाय) ऐन, २०७३ को दफा ३१ को उपदफा (२) बमोजिम खर्चको विवरण सर्वसाधारणको जानकारीका लागि सार्वजनिक गर्नुपर्ने प्रावधान छ ।

तोकिएको समयभित्र खर्च विवरण नबुझाउने वा सार्वजनिक नगर्ने उम्मेदवारलाई कानुनबमोजिम कारबाही हुने भएपछि उम्मेदवारहरूले सामाजिक सञ्जालमार्फत समेत विवरण सार्वजनिक गरिरहेका छन् ।