प्रधानमन्त्री कप क्रिकेट फाइनल खेल शनिबार हुने, उपाधिका लागि एपिएफ र आर्मी भिड्ने

त्रिभुवन आर्मी क्लब नेपाल पुलिस क्लबलाई दुई विकेटले हराउँदै प्रधानमन्त्री कप एकदिवसीय क्रिकेट प्रतियोगिताको फाइनलमा प्रवेश गरेको छ।

शुक्रबार कीर्तिपुरस्थित त्रिभुवन विश्वविद्यालयको क्रिकेट मैदानमा पुलिसले दिएको ३ सय ५ रनको लक्ष्य आर्मीले १ बल बाँकी रहँदा ८ विकेट गुमाएर पूरा गर्दै अर्को विभागीय टोली एपिएफसँगको भेट पक्का गरेको हो।

आर्मीका लागि सम्हालिएको इनिङ खेलेका राजेशले ३७ बलमा ३ चौका र २ छक्काको मद्दतमा अविजित ४३ रन जोडे। रोहितकुमार पौडेलले ८७ बलमा ९ चौकाको मद्दतमा ८९ रन जोड्दा ओपनर हरि चौहानले ९२ बलमा ८ चौका र १ छक्काको मद्दतमा ७५ रन जोडेका थिए। कप्तान विनोद भण्डारीले ३२ रन बनाउँदा विक्रम सोबले ३० तथा ओपनर अर्जुन साउदले ११ रनको व्यक्तिगत स्कोर बनाएका थिए।

बलिङतर्फ पुलिसका करण केसी एक्लैले ६ विकेट लिए पनि टोलीको हार टार्न सकेनन्। राशिद खान र ललित राजवंशीले १/१ विकेट आफ्नो नाममा लेखाए।

यसअघि टस हारेर ब्याटिङ गरेको पुलिसले पूरा ५० ओभरमा ४ विकेट गुमाएर ३ सय ४ रनको योगफल तयार पारेको थियो। ३ विकेट गुमाएर ६७ रनको खराब स्थितिमा रहेको पुलिसका लागि कप्तान दिपेन्द्रसिंह ऐरी र आरिफ शेखले चौथो विकेटका लागि २ सय ४ रनको साझेदारी गरेसँगै पुलिसलाई सम्मानजनक स्कोरमा पुर्‍याएका थिए।

विस्फोटक ब्याटिङ गरेका दिपेन्द्रले १ सय २५ बलमा ११ चौका र ५ छक्काको मद्दतमा १ सय ४० रन जोडे। आरिफले १ सय ९ बलमा ८ चौका र २ छक्का मद्दतमा अविजित ९१ रन जोडेका थिए। बलिङतर्फ आर्मीका तीव्र गतिका बलर विक्रम सोबले ३ विकेट लिए भने सुशन भारीको नाममा १ विकेट रह्यो।

यससँगै साविक विजेता आर्मीले एपिएफसँगको भेट पक्का गरेको छ। एपिएफले यसअघि भएको पहिलो सेमिफाइनल खेलमा मधेश प्रदेशलाई हराउँदै फाइनल यात्रा तय गरेको थियो।

उपाधिका लागि शनिबार आर्मी र एपिएफ मैदानमा उत्रनेछन्।