दोस्रो अभ्यास खेलमा पनि नेपाल विजयी

अडियोमा सुन्नुहोस

नेपाली राष्ट्रिय क्रिकेट टोलीले ह्युस्टन हरिकेन्सलाई दोस्रो तथा अन्तिम अभ्यास खेलमा पनि हराएको छ ।

आईसीसी टी–२० विश्वकप क्रिकेटको तयारीका लागि गए राति प्रेरी भ्यू क्रिकेट कम्प्लेक्समा भएको खेलमा नेपालले ह्युस्टन हरिकेन्सलाई २७ रनले हराएको हो ।

योसँगै नेपालले दुई खेलको शृङ्खला क्लिन स्वीप गरेको छ ।

नेपालले दिएको १ सय २४ रनको सामान्य लक्ष्य पछ्याएको ह्युस्टन १८ ओभर ३ बलमा ९६ रनमा अल आउट भयो ।

ह्युस्टनका जिया शेहजादले सबैभन्दा धेरै ३५ रन बनाए । नेपालका करण केसीले ३, सोमपाल कामीले २ तथा कप्तान रोहितकुमार पौडेल, अबिनाश बोहरा र सागर ढकालले समान १ विकेट लिए ।

यसअघि टस जितेर ब्याटिङ गरेको नेपालले २० ओभरमा ६ विेकट गुमाउँदै १ सय २३ रन बनायो । नेपालका रोहितकुमार पौडेलले ३७, कुशल भुर्तेलले २३ रन बनाए ।

ह्युस्ट हरिकेन्सका शेख जुनियर र जिया शेहजादले समान २ विकेट लिए ।हिजो भएको पहिलो अभ्यास खेलमा नेपाल ६ रनले विजयी भएको थियो ।

अब नेपाली टोली टेक्सासको डालास जानेछ । त्यहाँ नेपालले अमेरिका र क्यानडासँग विश्वकपअघिको आधिकारिक अभ्यास खेल खेल्नेछ ।

क्यानडासँग मे २७ अर्थात् पर्सि सोमवार र अमेरिकासँग मे ३० अर्थात् बिहीवार खेल्नेछ ।

त्यसपछि नेपालले टी–२० विश्वकपको आफ्नो पहिलो खेल जुन ४ तारिखमा नेदरल्यान्ड्ससँग खेल्नेछ ।तस्बिर : क्यान