बुढीगण्डकी आयोजनाको बजेट कटौती गरेकोमा युवासंघ धादिङको आपत्ति

धादिङ,१७ बैशाख।
राष्ट्रिय गौरवको आयोजना बुढीगण्डकी जलविद्युत आयोजनाको बजेट कटौती गरेकोमा राष्ट्रिय युवासंघ धादिङले आपत्ति जनाएको छ ।

आयोजनाको बजेट रकमान्तर विरुद्ध राष्ट्रिय युवा संघ धादिङले आईतबार जिल्ला प्रशासन कार्यालयमा ध्यानाकर्षण पत्र बुझाएको छ। राष्ट्रिय युवा संघ धादिङका अध्यक्ष सुनिल तामाङको नेतृत्वमा गएको टोलिले प्रमुख जिल्ला अधिकारी रमेश ढकाल मार्फत उर्जा तथा जलस्रोत,सिचाई मन्त्रालयलाई ध्यानाकर्षण पत्र बुझाएको हो ।

धादिङ र गोरखा भई बग्ने बुढिगण्डकीमा निर्माण हुन लागेको १२ सय मेगावाट विद्युत आयोजनाको प्रभावित क्षेत्र भित्र पर्ने आवादी जग्गाको मुआब्जा वितरण गरि नसकेको, घरगोठ र वोटबिरुवाको मुआब्जा वितरणको अन्तिम चरणमा रहेको अवस्थामा राष्ट्रिय गौरवको आयोजना निमार्णको लागि नेपाल सरकारले आर्थिक वर्ष २०७९/८० को विनियोजित बजेट मध्ये १ अर्व रकम सुनकोसी मरिन डाईभर्सन बहुउद्धेशीय आयोजना र ४० करोड रकम चितवनको नदी नियन्त्रण प्रयोजनको लागि रकमान्तर गरि बजेट कटौती गरेकोले उक्त निर्णय तत्काल फिर्ता लिई आम नागरिकका लागि संघीय सरकारको अनुभुति दिलाउन युवा संघ धादिङले माग गरेको छ ।

साथै विकास विरोधी क्रियाकलापविरुद्ध युवा संघ धादिङले चरण बद्ध आन्दोलनको कार्यक्रमहरु सार्वजनिक गर्न बाध्य हुने ध्यानाकर्षण पत्रमा भनिएको छ ।

यस्तै आईतबार नै सिउरीनिटारस्थित बुढीगण्डकी परियोजनाको कार्यालयमा समेत ध्यानाकर्षण पत्र बुझाएको युवा संघ धादिङका सचिव हरिशरण जम्कट्टेलले बताउनुभयो ।