रक्तदान कार्यक्रम नहुँदा धादिङमा रगतको अभाव

धादिङ,३० चैत ।
धादिङ रगतको अभाव खड्किएको छ ।

पछिल्लो समय रक्तदानका कार्यक्रमहरु नहुँदा रगत संकलन हुन नसकेकाले अभाव भएको नेपाल रेडक्रस सोसाईटी धादिङका कोषाध्यक्ष तथा स्वास्थ्य संयोजक नारायण कुमार श्रेष्ठले बताउनुभयो ।

पहिले महिनामा ७ भन्दा बढी रक्तदान कार्यक्रम हुँदै आएकोमा पछिल्ला २ महिना यता रक्तदान कार्यक्रमहरु नहुँदा रगतको चरम अभाव भएको श्रेष्ठको भनाई छ ।

रक्तदान नहुँदा अहिले धादिङ जिल्ला जिल्लामा रगत आवश्यक पर्ने बिरामीहरू निकै मारमा परेका छन् । रगतको अभाव खड्किएपछि सामाजिक सञ्जालमा रगत आवश्यकता भन्दै माग गर्न थालिएको कोषाध्यक्ष श्रेष्ठले बताउनुभयो ।

केही समय अघिसम्म जिल्लामा बढी भएको रगत काठमाडौं लगायतका जिल्लाहरुमा समेत पठाउने गरेको भन्दै उहाँले रगत अभावकै कारण विरामीलाई डिस्चार्ज गर्नुपर्ने अवस्था समेत रहेको बताउनुभयो ।

उहाँले जिल्लाका सरोकारवाला निकायको ध्यान जान जरुरी रहेको भन्दै जिल्लाका १३ वटै पालिका, बिभिन्न सरकारी निकाय बिद्यालय, क्याम्पस, संघ संस्था तथा सहकारीहरुले आफ्नो क्यालेण्डरमै रक्तदान कार्यक्रमको तालिका बनाएर रक्तदानको कार्यक्रम नगरे धादिङमा देखिएको रगत अभावको समाधान गर्न नसकिने बताउनुभयो ।

रक्तदान कमी हुनुमा बैदेशिक रोजगारले चुनौती थपिएको बताउनुभयो । १२ पास गरेका युवा युवतीहरु,नियमित रक्तदाताहरु विदेश पलायन हुदाँ रक्तदानका कार्यक्रम हुदाँ पनि नियमित रक्तदाता नहुँदा रगत संकलन हुन नसकेको बताउनुभयो।

श्रेष्ठका अनुसार अहिले धादिङ अस्पतालमा दैनिक ५ देखी ७ पिन्ट र महिना को १५० भन्दा बढि पिन्ट रगत खपत हुदैँ आएको छ । रेडक्रस धादिङका कोषाध्यक्ष तथा स्वास्थ्य संयोजक श्रेष्ठले जिल्लामा रक्तदान कार्यक्रमको अभियान चलाउँदै आउनुभएको छ ।