स्वास्थ्य सेवा विस्तारसँगै धादिङका स्वास्थ्य सूचकमा सकारात्मक सुधार

धादिङ । जनस्वास्थ्य कार्यालय धादिङले आर्थिक वर्ष २०८२/०८३ मा जिल्लाभर सञ्चालन गरिएका स्वास्थ्य कार्यक्रमबाट हासिल भएका उपलब्धि, सेवा विस्तारका प्रयास तथा आगामी कार्ययोजना सार्वजनिक गरेको छ।

जनस्वास्थ्य कार्यालयको सभाहलमा आयोजित कार्यक्रममा जिल्लाको स्वास्थ्य क्षेत्रमा भएका प्रगति, जनस्वास्थ्य सुधारका लागि सञ्चालन गरिएका कार्यक्रम तथा आगामी रणनीतिबारे विस्तृत जानकारी प्रस्तुत गरिएको थियो।

कार्यक्रममा खोप सेवा, मातृ तथा नवजात शिशु स्वास्थ्य, सुरक्षित मातृत्व, पोषण सुधार, परिवार नियोजन, सरुवा तथा नसर्ने रोग नियन्त्रण, स्वास्थ्य संस्थाको सुदृढीकरण तथा समुदायमा आधारित स्वास्थ्य सेवाका क्षेत्रमा हासिल भएका उपलब्धिहरू सार्वजनिक गरिएको थियो।

कार्यक्रममा जनस्वास्थ्य कार्यालय धादिङका प्रमुख अर्जुन पौडेलले स्वास्थ्य सेवाको पहुँच विस्तार, गुणस्तर सुधार तथा समुदायसम्म प्रभावकारी सेवा प्रवाह गर्न कार्यालय निरन्तर क्रियाशील रहेको बताउनुभयो।

उहाँले दुर्गम क्षेत्रसम्म खोप सेवा, मातृ तथा शिशु स्वास्थ्य सेवा, पोषण कार्यक्रम र रोग नियन्त्रणका गतिविधि प्रभावकारी रूपमा सञ्चालन गरिएकाले जिल्लाको समग्र स्वास्थ्य सूचकमा सकारात्मक सुधार देखिएको उल्लेख गर्नुभयो।

“स्वास्थ्य सेवा केवल उपचारमा सीमित छैन, समुदायमा रोग रोकथाम, स्वास्थ्य प्रवर्द्धन र जनचेतना अभिवृद्धि हाम्रो प्राथमिकता हो,” उहाँले भन्नुभयो, “स्थानीय तह, स्वास्थ्यकर्मी तथा सरोकारवालासँगको सहकार्यबाट जिल्लाका नागरिकलाई गुणस्तरीय स्वास्थ्य सेवा उपलब्ध गराउन सफल भएका छौं।”

कार्यक्रमको सहजीकरण गर्दै जनस्वास्थ्य निरीक्षक तोयानाथ छतकुलीले कार्यालयले आर्थिक वर्षभर सञ्चालन गरेका कार्यक्रम, प्राप्त उपलब्धि तथा तथ्याङ्कसहितको कार्यपत्र प्रस्तुत गर्नुभयो।

उहाँले आगामी आर्थिक वर्षमा स्वास्थ्य सेवाको गुणस्तर अभिवृद्धि, स्वास्थ्य पूर्वाधार सुदृढीकरण, जनचेतनामूलक अभियान विस्तार तथा स्थानीय तहसँगको समन्वयलाई थप प्रभावकारी बनाउने योजना रहेको जानकारी दिनुभयो।

कार्यक्रममा सहभागी सञ्चारकर्मीहरूले स्वास्थ्य सेवा विस्तार, रोग नियन्त्रण तथा जनस्वास्थ्य प्रवर्द्धनका क्षेत्रमा जनस्वास्थ्य कार्यालयले गरेका प्रयासहरूको प्रशंसा गरेका थिए।

उनीहरूले स्वास्थ्यसम्बन्धी सूचना तथा जनचेतनामूलक सामग्रीलाई अझ प्रभावकारी रूपमा समुदायसम्म पुर्‍याउन सञ्चारमाध्यम र जनस्वास्थ्य कार्यालयबीच सहकार्यलाई थप सुदृढ बनाउनुपर्नेमा जोड दिएका थिए।

नेपाल पत्रकार महासंघ धादिङ शाखाका अध्यक्ष सिताराम अधिकारीले जनस्वास्थ्य कार्यालयले जिल्लाको स्वास्थ्य क्षेत्रमा खेलेको भूमिकाको प्रशंसा गर्दै आगामी दिनमा पनि स्वास्थ्य सेवा प्रवाहलाई नागरिकमैत्री, प्रभावकारी र पहुँचयोग्य बनाउन निरन्तरता दिनुपर्ने बताउनुभयो।

जनस्वास्थ्य कार्यालय धादिङले पछिल्ला वर्षहरूमा स्वास्थ्य सेवा विस्तार, खोप अभियानको प्रभावकारी कार्यान्वयन, मातृ तथा शिशु स्वास्थ्य सुधार, रोग नियन्त्रण तथा स्वास्थ्य सचेतना अभिवृद्धिका क्षेत्रमा उल्लेखनीय काम गर्दै आएको जनाएको छ।