मुलुकभर ४४० स्वास्थ्य संस्थामा बीमा कार्यक्रम लागु:कार्यक्रमप्रति नागरिकको विश्वास घट्दै

अडियोमा सुन्नुहोस

धादिङ,२७ असोज ।
मुलुकभर ४ सय ४० वटा स्वास्थ्य संस्थामा बीमा कार्यक्रम लागू भएका छन् ।

तर बीमितले औषधि तथा समयमा स्वास्थ्य सेवा नपाउनु, सेवा प्राप्त गर्न लामो समय लाइन कुर्न बाध्य हुनु, बीमा गरेका र बीमा नगरेका बिरामीको सेवामा विभेद हुनु, प्रथम सेवा बिन्दुबाट थप उपचारको लागि ठूला अस्पतालमा ‘रिफर’ गर्दा आवश्यक कागजातको व्यवस्था नहुनु र नगर्नु जस्ता विषयले बीमा कार्यक्रमप्रति नागरिकको विश्वास घट्दै गइरहेको छ ।

स्वास्थ्य बीमा कार्यक्रममा विभिन्न समस्या तथा चुनौतीहरू बढ्दै गएपछि सरकारले उच्चस्तरीय कार्यदल गठन गरेको थियो । तरसमस्या समाधान गर्न कार्यदल गठन गरेको दुई महिना बितिसक्दा पनि प्रतिवेदन पेश गर्न सकेको छैन ।

जबकी, उक्त प्रतिवेदन तीन हप्ताभित्र पेश गर्न स्वास्थ्यमन्त्री भवानी खापुङले २३ साउनमा स्वास्थ्य राज्यमन्त्री हिराचन्द्र केसीको अध्यक्षतामा ५ सदस्यीय कार्यदल गठन गरेका थिए ।

जसमा स्वास्थ्य मन्त्रालयका प्रमुख विशेष गुणराज लोहनी, बीमा बोर्डका सदस्य डा. सुरेश तिवारी, श्रम, रोजगार तथा सामाजिक सुरक्षा मन्त्रालयका सह–सचिव र प्रमुख औषधि व्यवस्थापक नारायण ढकाल छन् ।

राज्यमन्त्री केसी कार्यदलमा भएका सदस्य छलफलमा उपस्थिति नहुँदा प्रतिवेदन तयार गर्न नसकिएको बताउँछन् ।अबको केही दिनभित्रैमा कार्यदलमा भएका सबैलाई बैठक बोलाएर प्रतिवेदन पूरा गर्न राज्यमन्त्री केसीले बताए ।

स्वास्थ्य बीमा सरकारी अस्पतालले मात्रै धान्न नसक्ने हुँदा निजी अस्पतालबाट हुने चुहावटलाई रोक्ने तथा अनुगमन कडा बनाउने खालका काम गर्नुपर्ने देखिएको मन्त्री केसीले बताउनुभयो ।