चार लाख ६६ हजारले छाडे काठमाडौँ

काठमाडौँ उपत्यका छाड्ने यात्रुको सङ्ख्या दिन प्रतिदिन बढिरहेको छ ।

घटस्थापनापछि आजसम्म कुल चार लाख ६६ हजार नागरिक दसैँ मनाउन काठमाडौँ उपत्यका छाडेर गएका काठमाडौँ उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्रप्रसाद भट्टले जानकारी दिए।

पछिल्लो २४ घण्टामा एक लाखले उपत्यका छाडेका छन् ।

घटस्थापनाको दिन २८ गते ५१ हजार दुई सय ७९,२९ गते ५१ हजार तीन सय ८७,३० गते ७३ हजार आठ सय ९६, कात्तिक १ गते ९१ हजार एक सय दुई र २ गते ९८ हजार तीन सय ३२ जनाले उपत्यका छाडेका छन् ।

निजी सवारीसाधनमार्फत जानेहरूको सङ्ख्या गणना नहुने भएकाले अझै धेरै सङ्ख्यामा नागरिक उपत्यका छाडेको प्रहरीले जनाएको छ ।