विद्यार्थीबाट अनाधिकृत शुल्क नलिन विद्यालयलाई नीलकण्ठ नगरपालिकाको निर्देशन

धादिङ । नीलकण्ठ नगरपालिकाले सामुदायिक तथा संस्थागत विद्यालयहरूलाई विद्यार्थीबाट अनाधिकृत तथा अतिरिक्त शुल्क नलिन निर्देशन दिएको छ।

सामुदायिक विद्यालयहरूले कक्षा ८, १० र १२ का विद्यार्थीहरूबाट चारित्रिक प्रमाणपत्र, लब्धाङ्क पत्र (मार्कसिट) तथा प्रोभिजनल प्रमाणपत्र उपलब्ध गराएबापत रकम लिने गरेको तथा संस्थागत विद्यालयहरूले विभिन्न शीर्षकमा निर्धारित मापदण्डभन्दा बढी शुल्क असुल्ने गरेको भन्दै जनगुनासो आएको नगरपालिकाले जनाएको छ।

नगरपालिकाले प्रचलित शिक्षा सम्बन्धी कानून, नियम तथा मापदण्डबमोजिम मात्र शुल्क लिनुपर्ने स्पष्ट गर्दै कुनै पनि विद्यार्थीबाट अनाधिकृत वा अतिरिक्त शुल्क नलिन सबै विद्यालयलाई निर्देशन दिएको छ।

नगरपालिकाका प्रमुख प्रशासकीय अधिकृत हरिदत्त कंडेलले जारी गर्नुभएको सूचनामा नगरपालिकाबाट समय-समयमा विद्यालयहरूको अनुगमन गरिने र अनुगमनका क्रममा नियमविपरीत शुल्क असुलिएको पाइएमा प्रचलित कानून तथा नियमअनुसार आवश्यक कारबाही गरिने चेतावनी समेत दिइएको छ।