बर्ड फ्लूको त्रास बढ्दै, धादिङका प्रमुख नाकाहरुमा निगरानी

धादिङ। देशका विभिन्न जिल्लामा बर्ड फ्लू संक्रमण फैलिन थालेपछि धादिङमा सतर्कता बढाइएको छ।

संक्रमण जिल्लाभित्र प्रवेश गर्न नदिन जिल्ला स्तरीय बर्ड फ्लू प्राविधिक समितिले प्रमुख प्रवेश नाकाहरूमा कडा निगरानी सुरु गरेको छ।

जिल्लामा भित्रिने कुखुरा, चल्ला, अण्डा तथा अन्य कुखुराजन्य वस्तुको नियमित परीक्षण र अनुगमन भइरहेको पशु सेवा कार्यालय धादिङले जनाएको छ।

विशेष गरी संक्रमण देखिएका जिल्लाबाट आउने ढुवानीमाथि निगरानी बढाइएको कार्यालयले जनाएको छ।

बर्ड फ्लू नियन्त्रण तथा रोकथामका लागि आवश्यक सबै तयारी गरिएको वरिष्ठ पशु विकास अधिकृत डा.बबलु ठाकुरले जानकारी दिनुभयो। उहाँका अनुसार कुखुराको स्वास्थ्य अवस्था, भेटेरिनरी स्वास्थ्य प्रमाणपत्र लगायतका आवश्यक कागजात जाँच गर्ने कार्यलाई प्राथमिकतामा राखिएको छ।

नियमविपरीत वा जोखिमयुक्त क्षेत्रबाट ल्याइएका कुखुरा तथा कुखुराजन्य वस्तुमाथि आवश्यक कानुनी कारबाहीसमेत गरिने उहाँको भनाई छ ।

कुखुरा तथा कुखुराजन्य वस्तुको ओसारपसार प्रायः रातिको समयमा हुने भएकाले रात्रीकालीन निगरानीलाई पनि प्रभावकारी बनाइएको छ।

संक्रमण फैलिने सम्भावनालाई ध्यानमा राख्दै अनुगमन टोलीलाई थप सक्रिय बनाइएको जनाइएको छ। हालसम्म धादिङमा बर्ड फ्लू संक्रमण पुष्टि भएको अवस्था नरहेको वरिष्ठ पशु विकास अधिकृत डा.ठाकुरले बताउनुभयो ।

यद्यपि आवश्यक कागजातबिना कुखुरा वा कुखुराजन्य सामग्री ल्याउने सवारी तथा व्यवसायीलाई सचेत गराउँदै फिर्ता पठाउने कार्य भइरहेको छ।

जिल्ला प्रशासन कार्यालय, जिल्ला प्रहरी कार्यालय तथा पशु सेवा कार्यालयको संयुक्त टोलीले पृथ्वी राजमार्ग र त्रिभुवन राजपथका विभिन्न नाकाहरूमा नियमित अनुगमन गरिरहेको छ।

काठमाडौंसँग देशका विभिन्न जिल्लालाई जोड्ने मुख्य मार्ग धादिङ भएर जाने भएकाले संक्रमण रोकथामका लागि विशेष सतर्कता अपनाइएको प्रमुख जिल्ला अधिकारी लक्ष्मी गौतम पाण्डेयले बताउनुभयो ।