धादिङ–२ को प्रदेश सभा ‘ख’ मा खसेको भन्दा धेरै मतपत्र भेटिएपछि मतगणना स्थगित

धादिङको प्रतिनिधि सभा क्षेत्र नम्बर–२ को प्रदेश सभा ‘ख’ मा खसेको भन्दा धेरै मतपत्र भेटिएपछि मतगणना स्थगित भएको छ । १ हजार १ सय ९ मतदाताले मतदान गरेको मुचुल्का भएको तर मत गन्ने तयारी गर्दा १ हजार २ सय १ मतपत्र भेटिए पछि गणना स्थगित भएको हो ।

खनियाँबास गाउँपालिका-४ गणेशकुण्ड मतदान केन्द्रको मतपेटिकाको दुई वटा सिल तोडिएको भन्दै राप्रपा र एमालेका कार्यकर्ताहरुले प्रदर्शन समेत गरेका छन् । चार वटा केन्द्रको खसेको मतमा ९२ मतपत्र धेरै भेटिएको छ ।

पछिल्लो मतपरिणाम अनुसार प्रदेश सभा ‘ख’ का उम्मेदवार नेकपा माओवादी केन्द्रका जगत सिंखडा २४६ मतले राप्रपाका उम्मेदवार डम्बर तामाङ भन्दा अगाडि हुनुहुन्छ । सिम्खडाको ९ हजार ८ सय ९ र तामाङको ९ हजार ५ सय ६३ मत रहेको छ ।