धादिङमा १ हजार ५९४ पिन्ट रगत संकलन,सबैभन्दा धेरै मैदीमा १४० जनाले गरे रक्तदान

धादिङ,०३ माघ ।
नेपाल रेडक्रस सोसाइटी धादिङले चालु आर्थिक बर्षको हालसम्म १ हजार ५९४ पिन्ट रगत संकलन गरेको छ ।

धादिङ रेडक्रसका उपमन्त्री नारायण कुमार श्रेष्ठका अनुसार चालु आर्थिक बर्ष २०७९/०८० को साउन १ देखि माघ १ सम्म १ हजार ५९४ जनाले रक्तदान गरेका छन् । यस चालु आर्थिक बर्षमा सबैभन्दा धेरै ज्वालामुखी गाउँपालिका–३ मैदी हटियास्थित मैदीकोटमा १४० जनाले रक्तदान गरेका छन् ।

चौथो खड्कदेवी सांस्कृतिक उत्सवको अवसरमा माघ १ गते आईतबार रेडक्रस सोसाईटी मैदी उपशाखाको आयोजना तथा ज्वालामुखी–३ को सहआयोजनामा भएको रक्तदान कार्यक्रममा २८ महिला र ११२ पुरुष गरि १४० जनाले रक्तदान गरेको रेडक्रसका उपमन्त्री श्रेष्ठले बताउनुभयो।

रक्त संचार सेवा केन्द्र धादिङको प्राविधिक सहयोग रहेको रक्तदान कार्यक्रममा रक्तदान कार्यक्रममा मैदीकोट खड्देवी मन्दिर संरक्षण समिति, खड्कदेवी युवा क्लब, मैदी ग्रामिण कृषि बहुउदेश्यीय सहकारी संस्था लिमिटेड मैदी, लायन्स क्लब अफ काठमाण्डौँ ब्लड सर्कल, लायन्स क्लब अफ सोसियल सर्कल काठमाण्डौँ, लायन्स क्लब अफ काठमाण्डौँ जुपिटर र सामाजिक रुपान्तरणको लागि स्थानीय प्रयास नेपालको सहकार्य रहेको थियो।

जिल्लामा अभियानकै रुपमा रक्तदान कार्यक्रम आयोजना गरिदै आएको छ। रगतको चरम अभावलाई न्युनीकरण गर्नको लागी विभिन्न मेला, पर्व, उत्सव, विद्यालयको बार्षिक उत्सव,सहकारीको बार्षिक साधारण सभा लगायतको भेला हुने कार्यक्रममा रक्तदान कार्यक्रम राखि धादिङमा रगत संकलन गरीदैँ आएको उपमन्त्री श्रेष्ठले बताउनुभयो ।