धादिङमा ‘वन डढेलो सचेतना सप्ताह’ : सचेतना अभियानदेखी माइकिङ र पर्चा वितरण सम्मका कार्यक्रम

धादिङ,०७ चैत ।
धादिङमा संचालन भएको ‘वन डढेलो सचेतना सप्ताह’ डढेलो नियन्त्रण सम्बन्धी सप्ताहव्यापी कार्यक्रम सम्पन्न भएको छ ।डिभिजन वन कार्यालय धादिङको आयोजनामा गत बुधबारदेखि सुरु भएको वन डढेला सचेतना सप्ताह आज सम्पन्न भएको हो ।

वन डढेलो व्यवस्थापनका लागि निरोधात्मक उपाय अवलम्बन गर्दै वन डढेलोबाट हुने जन, धन र वनको क्षति न्यूनीकरण गर्नका लागि ‘वनमा डढेलो नियन्त्रण, जैविक विविधताको संरक्षण’ भन्ने मूल नारासहित चैत १ देखि सञ्चालन गरिएको ‘वन डढेलो सचेतना सप्ताह’ आज सकिएको डिभिजन वन कार्यालय धादिङका सूचना अधिकारी टंक श्रेष्ठले जानकारी दिनुुभयो ।

सप्ताहव्यापी कार्यक्रम अन्तर्गत अभियान अन्तर्गत जिल्लाको बिभिन्न स्थानमा अग्नि रेखा बनाउने, सफा गर्ने, डेमो गराउने, पातपतिङ्गर हटाउने तथा जलाउने, विद्यार्थीहरुलाई वन डढेलो सम्बन्धि सचेतना लगाएतका लगायत काम गरिएको श्रेष्ठले बताउनुभयो ।

साथै जिल्लाका सुरक्षा निकायहरू नेपाल प्रहरी, सशस्त्र प्रहरी बल तथा नेपाली सेना र विभिन्न सामुदायिक वन उपभोक्ता समूहहरुलाई डढेलो व्यवस्थापन सामग्री समेत हस्तान्तरण गरिएको श्रेष्ठले बताउनुभयो ।

साथै सहायक वन अधिकृत लोकनाथ लम्सालको नेतृत्वमा धादिङबेशी–सुनौलाबजार–फोसेटार–गल्छी–गोगनपानी–जीबनपुर–भन्ज्याङपोखरी पिपलामोड–नौबिसे–धार्के–गजुरी हुँदै धादिङबेशी सम्म माइकिङ गरिएको छ । साथै सर्वसाधारणलाई वन डढेलो सम्बन्धी अनुरोध पर्चा समेत बितरण गरी वन डढेलो बिरूद्ध सचेत पनि गरिएको श्रेष्ठको भनाई छ ।

बन डढेलो पहिचान तथा अनुगमन प्रणलीको विगत ५ बर्षको डढेको तथ्याङ्क अनुसार जिल्लाको १३ स्थानिय तह मध्ये तिन वटा स्थानिय तह  वन डढेलोको उच्च जोखिममा रहेको छ ।

रुवी भ्याली, बेनिघाट रोराङ गाउँपालिका र नीलकण्ठ नगरपालिका वन डढेलोको उच्च जोखिममा रहेको डिभिजन वन अधिकृत अजय विक्रम मान्नधरले बताउनुुभयो ।

गर्मी मौसम सुरु भएकोले सानो आगोको भिल्कोले पनि ठुलो वन डढेलोको रुप लिन सक्ने हुँदा डढेलोबाट जोगाई वन जंगल र जैविक विविधताको संरक्षण गर्न मान्नधरले आग्रह गर्नुभएको छ ।