८०४ भित्तेपात्रोलाई पञ्चाङ्ग निर्णायक समितिको स्वीकृति

धादिङ,०३ बैशाख।
वि.सं. २०८० का लागि ८०४ भित्तेपात्रो (क्यालेन्डर)लाई नेपाल पञ्चाङ्ग निर्णायक विकास समितिले स्वीकृति दिएको छ ।

भित्तेपात्रो प्रकाशन गर्नेले समितिको स्वीकृति लिनुपर्ने आदेश बमोजिम वि.सं. २०८० का लागि हालसम्म ८०४ वटा भित्तेपात्रोले स्वीकृति पाएको र अहिले पनि केही भित्तेपात्रो प्रकाशन गर्ने संस्था स्वीकृति लिने क्रममा रहेको समितिका कार्यकारी निर्देशक सूर्यप्रसाद ढुङ्गेलले जानकारी दिनुभयो ।

समितिको स्वीकृति नलिई प्रकाशन हुने भित्तेपात्रोलाई कारबाही प्रक्रिया अघि बढाइएको ढुङ्गेलले बताउनुभयो । स्वीकृति नलिई प्रकाशन हुने भित्तेपात्रोमा तिथि, मिति, चाड पर्वलगायतमा दोहोरोपन आउन थालेकाले सरकारले यस्तो व्यवस्था गरेको हो ।

समितिले अनलाइनबाटै भित्तेपात्रो प्रकाशनका लागि फारम भरेर स्वीकृति लिन सक्ने व्यवस्था पनि गरेको छ । सरकारले २०७७ पुस २० गते भित्तेपात्रो प्रकाशन गर्नेले समितिको स्वीकृति लिनुपर्ने गरी गठन आदेश जारी गरेको थियो ।

गत वर्ष करीब एक हजार भित्तेपात्रो स्वीकृति लिएर प्रकाशन गरिएको थियो ।