बञ्चरेडाँडा ल्यान्डफिल्ड साइट प्रभावितकाे चेतावनी:असाेज १ देखि फाेहर राेक्छौ

बञ्चरेडाँडा ल्यान्डफिल्ड साइटका प्रभावितहरूले असोज १ गतेदेखि काठमाडौ उपत्यकाको फेरि फोहोर रोक्ने चेतावनी दिएका छन् ।

यसअघि पटक पटक सम्झौता भए पनि कार्यान्वयन नभएपछि अब कार्यान्वयन शुरु नहुन्जेल अवरोध गर्ने गरी निर्णायक आन्दोलन गर्न लागेको सङ्घर्ष समितिका संयोजक श्रीराम ढुङ्गानाले जानकारी दिनुभयो । समितिले आफ्ना मागसहितको अपिल काठमाण्डौ र ललितपुर महानगरपालिका तथा भक्तपुर नगरपालिकालाई बुझाएको उहाँले बताउनुभयो ।

समितिले प्रभावित क्षेत्रको मानव बस्ती स्थानान्तरणका लागि नेपाल सरकार र काठमाण्डौ महानगरपालिकाले १७ वर्षअघि गरेको सम्झौता तत्काल कार्यान्वयन गर्नुपर्नेसहित सात वटा माग राखेको छ ।