त्रिशूलीमा आएको बाढीले बगायो ३ वटा टिपर र २ वटा एक्साभेटर

काठमाडौं ।त्रिशूली नदीमा आएको बाढीले ३ वटा टिपर र २ वटा एक्साभेटर बगाएको छ ।

सशस्त्र प्रहरी बलका केन्द्रीय सह–प्रवक्ता एवं प्रहरी नायब उपरीक्षक शैलेन्द्र थापाका अनुसार गोरखाको गण्डकी गाउँपालिका–१, बुट्टार र चितवनको इच्छाकामना गाउँपालिका–३, चुमखोलाको सिमानामा निर्माणाधीन सुपर त्रिशूली जलविद्युत् आयोजनाको एक्साभेटर र टिपर बगाएको हो।

अविरल वर्षाका कारण नदीमा आएको भीषण बाढीले शुक्रबार राति करिब १०ः१० बजे बगाएको थापाले जानकारी दिनुभयो ।

नदीको बीच भागमा रहेको मेसिन तथा टिपर बाढीले बगाएको आयोजनाका कर्मचारी सङ्गम मग्रातीले बताउनुभयो ।

नदीमा भीषण बाढी आएपछि दिउँसोदेखि नै आयोजनाको तीनवटा टिपर, दईवटा एक्साभेटर नदीको बीचमा फसेका थिए ।

नदीको मध्यभागमा फसेको मेसिन निकाल्ने प्रयास गरिएको भए पनि नसकिएको उहाँको भनाइ छ ।

ब्लू इनर्जी कम्पनीले बुट्टारमा १०० मेगावाट क्षमताको सुपर त्रिशूली जलविद्युत् आयोजना निर्माण गरिरहेको छ ।

सोही आयोजना निर्माणमा प्रयोग भएका टिपर र एक्साभेटर नदीले बगाएको हो। तस्विर:सामाजिक सञ्जाल