नौ किलोमा ट्रक दुर्घटना : दुई जनाको मृत्यु,२ घाइते

नारायणघाट–मुग्लिन सडकखण्ड अन्तरगत चितवनको नौ किलोमा दुर्घटना हुँदा २ जनाको मृत्यु भएको छ।दुर्घटनामा २ जना घाइते भएका छन्।

आइतबार बेलुका नारायणगढबाट मुग्लिङतर्फ जाँदै गरेको बागमती प्रदेश ०३-००१ ख ३४९० नम्बरको ट्रक दुर्घटना हुँदा मकवानपुरको मकवानपुरगढी गाउँपालिका–६ बस्ने ३८ वर्षीय श्याम बजगाईं र सोही ठाउँका ३१ वर्षीय दीपक दाहालको भरतपुर अस्पतालमा मृत्यु भएको जिल्ला प्रहरी कार्यालय चितवनका डीएसपी ज्ञानकुमार महतोले जानकारी दिनुभयो।

उनीहरु दुवैजनालाई च्यापिएको अवस्थामा उद्धार गरेर भरतपुर अस्पताल पुर्‍याइएको थियो। दुर्घटनामा घाइते दुई जनाको अहिले उपचार भइरहेको छ भने एक जना सकुशल छन्।

दुर्घटनापछि फरार रहेका मकवानगढी गाउँपालिका ६ का २६ वर्षीय दिनेश पुडासैनीलाई आज बिहान ५ बजे नियन्त्रणमा लिइएको डीएसपी महतोले बताउनुभयो।

ट्रकमा चालकसहित ६ जना सवार रहेका थिए।