कक्षा १२ को परिक्षा आजदेखी सुरु,धादिङबाट ३ हजार ५९२ विद्यार्थी सहभागि

कक्षा १२ को परीक्षा आजदेखि सुरु भएको छ ।

परिक्षामा देशभर १४ सय ५७ परीक्षा केन्द्रमा चार लाख ६७ हजार तीन सय ८९ विद्यार्थी सहभागी भएका छन् । धादिङ जिल्लामा १४ परीक्षा केन्द्र निर्धारण गरिएको शिक्षा विकास तथा समन्वय इकाइ,धादिङले जनाएको छ ।

इकाइका अनुसार धादिङबाट ३ हजार ५९२ जना विद्यार्थी परिक्षामा सहभागि छन् ।यस वर्ष ५६ हजारभन्दा धेरै विद्यार्थी ग्रेड वृद्धि परीक्षामा सहभागी भएको राष्ट्रिय परीक्षा बोर्डले जनाएको छ ।

उनीहरूले जति विषयमा कम नम्बर आएको थियो त्यही विषयको मात्र ग्रेड वृद्धि परीक्षा दिनेछन् ।सरकारले लेटर ग्रेडिङ निर्देशिका, २०७८ संशोधन गर्दै जति वटा विषयमा एनजी (नन ग्रेड) आएको छ, त्यो विषयमा मात्र परीक्षा दिनुपर्ने व्यवस्था गरेको छ ।

अर्थात् ती विद्यार्थीहरुले जति वटा विषयमा एनजी ल्याएका छन्, ती विषयमा मात्रै परीक्षा दिन पाउने भएका छन् । परीक्षामा अमर्यादित क्रियाकलाप गरेमा विद्यार्थीको सबै परीक्षा रद्द गर्ने र एक वर्षसम्म कुनै पनि परीक्षा दिन नपाइने गरी कानुनी व्यवस्था गरेको बोर्डले जनाएको छ ।

सरकारले कक्षा १२ सम्मलाई माध्यमिक तह घोषणा गरेका कारण यो परीक्षा माध्यमिक तहको अन्तिम परीक्षाको रुपमा लिइएको छ । परीक्षा बिहान ८ बजेदेखि १२ बजेसम्म सञ्चालन हुने र जेठ ५ गते सकिने बोर्डले जनाएको छ ।