बैशाखमा मात्रैआगलागी र वन डढेलोबाट १६ को मृत्यु,६५ जना घाइते

काठमाण्डौ,३१ बैशाख ।
बैशाख महिनामा मात्रै आगलागी तथा वन डढेलोका घटनाबाट १६ जनाले ज्यान गुमाएका छन् भने ६५ जना घाइते भएका छन् ।

बैशाख १ गतेदेखि ३० गतेसम्म देशभर ५ सय २७ वटा आगलागी र ९४ वटा वन डढेलोका घटना भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्याङ्कमा उल्लेख गरिएको छ ।

प्राधिकरणका अनुसार आगलागीमा ११ जना र डढेलोमा परेर ५ जना गरी १६ जनाले ज्यान गुमाएका छन् । गर्मी बढेसँगै दैनिक आगलागी र डढेलोका घटना पनि बढ्न थालेका छन् ।

एक महिनामा आगलागी र वन डढेलोका ६ सय २१ वटा घटनामा मानवीयसँगै अन्य भौतिक तथा संरचनागत क्षति भएको छ ।

आगो तथा डढेलो लागेको देख्ने बित्तिकै पूर्वतयारीविना निभाउन जाँदा घाइते हुने तथा ज्यानै जाने जोखिम उच्च हुन्छ ।