एक महिनामा चट्याङबाट ५ जनाको मृत्यु,४३ जना घाइते

काठमाण्डौ,०३ ज्येष्ठ।
वैशाख १ गतेदेखि हिजोसम्ममा चट्याङ लागेर ५ जनाको ज्यान गएको छ भने ४३ जना घाइते भएका छन्।

पछिल्लो एक महिनामा चट्याङका ४४ वटा घटना परेर पाँच जनाको मृत्यु र ४३ जना घाइते भएको भएको राष्ट्रिय विपद् जोखिम न्यूनीकरण व्यवस्थापन प्राधिकरणले जनाएको छ ।

चट्याङ लागेर घाइते हुनेको सङ्ख्या अझै बढ्न सक्ने प्राधिकरणले जनाएको छ ।चट्याङ पर्दा शरीरमा त्यसको विद्युत् प्रवाह भएर घाइते हुने तथा ज्यान नै जाने खतरा हुने राष्ट्रिय विपद् जोखिम न्यूनीकरण व्यवस्थापन प्राधिकरणका प्रमुख कार्यकारी अधिकृत अनिल पोखरेलले बताउनुभयो ।

अझै तीन–चार महिना चट्याङ पर्ने सम्भावना उच्च हुने भएकाले सावधानी अपनाउन उहाँको आग्रह छ।चट्याङ पर्ने समयमा खेतबारीको काममा नजान र गड्याङगुडुङको आवाज सुनेपछि घरभित्र वा सुरक्षित ठाउँमा बस्न विज्ञको सुझाव छ ।

यस्तै, विज्ञका अनुसार चट्याङ पर्दा टेलिभिजन लगायतका सबै विद्युतीय उपकरणलाई बन्द गरेर तार निकाल्नु पर्छ।यस्तै, यस्तो बेला मोबाइल नचलाउन, चार्ज नगर्न तथा पानीबाट पनि टाढा बस्न विज्ञको सुझाव छ ।

उनीहरुका अनुसार पानीले पनि विद्युत् प्रवाह गर्ने भएकाले चट्याङ पर्दा चलाउनु हुँदैन।