अझै चार/पाँच दिन गर्मी यस्तै रहन्छ : मौसमविद्

अझै चार÷पाँच दिन गर्मी यस्तै रहने मौसमविद्ले बताएका छन् ।

तत्काल ठूलो वर्षाको सम्भावना नरहेकाले गर्मी तत्काल घट्ने सम्भावना नरहेको मौसमविद् रोजन लामिछानेले बताउनुभयो ।तराईका धेरैजसो जिल्लामा चार÷पाँच दिन नै तातो हावा लू चल्ने अनुमान छ ।

पहाडी केही जिल्लामा पनि ठूलो पानी पर्ने सम्भावना नरहेको तर एक÷दुई ठाउँमा भने फाट्टफुट्ट पानी पर्न सक्ने उहाँले बताउनुभयो । फाट्टफुट्ट वर्षाले तत्काललाई केही शीतल दिए पनि तापक्रम नघट्ने भएकाले गर्मी फेरि उस्तै हुने मौसमविद् लामिछानेले बताउनुभयो। यसपालि मनसुन पनि ढिलो गरी भित्रिने सम्भावना रहेकाले गर्मीको अवधि लम्बिने उहाँको भनाइ छ ।

गर्मी बढेसँगै बिरामी हुनेको सङ्ख्या पनि बढ्न थालेको छ ।देशभरका अस्पतालमा झाडापखाला, झाडाबान्ता, ज्वरो, टाइफाइट, रुघाखोकीका बिरामी बढेका छन् ।

गर्मीका कारण धेरैजसोलाई टाउको दुख्ने समस्या देखिएको डाक्टरले बताएका छन् । गर्मीमा खानेकुरा छिट्टै बिग्रने भएकाले खानपानमा ध्यान दिन पनि डाक्टरको सुझाव छ ।

गर्मीका बेला प्रशस्त शुद्ध पानी पिउन, बासी खानेकुरा नखान, सकेसम्म घाममा नहिँड्न, हिँड्नै परे छाता ओड्न, छहारी तथा शीतल ठाउँमा बस्न, पातलो कपडा लगाउन चिकित्सकको सुझाव छ ।