दासढुङ्गामा बस दुर्घटना:२६ जना घाइते

चितवनको दासढुङ्गामा बस दुर्घटना हुँदा २६ जना यात्रु घाइते भएका छन् ।

नारायणगढ–मुग्लिन सडक खण्डअन्तर्गत चितवनको भरतपुर महानगरपालिका वडा नम्बर–२९ दासढुङ्गामा बिहान सवा ५ बजेतिर बस दुर्घटना भएको हो ।

झापाको काँकडभिट्टाबाट काठमाण्डौका लागि छुटेको बाग्मती प्रदेश ०१–००६ ख ५२३७ नम्बरको बस अनियन्त्रित भएर दुर्घटना भएको जिल्ला ट्राफिक प्रहरी कार्यालय चितवनले जनाएको छ।

बस सडकबाट तल खसेर रुखमा अड्किएको अवस्थामा छ । ट्राफिक प्रहरीका अनुसार बस रुखमा अड्किएकाले त्रिशूली नदीमा खस्नबाट जोगिएको छ ।

दुर्घटनामा परि घाईते भएकामध्ये  १७ जनाको पुरानो मेडिकल कलेज र आठ जनाको भरतपुर अस्पताल चितवनमा उपचार भइरहेको प्रहरीले जनाएको छ।