नेपालमा अत्यावश्यक बाहेकका हेलिकप्टर उडानमा प्रतिबन्ध

नेपाल नागरिक उड्डयन प्राधिकरण (क्यान)ले नेपालमा अत्यावश्यक बाहेकका हेलिकप्टर उडानमा प्रतिबन्ध लगाएको छ ।

पछिल्लो पटक मनाङ एयरको हेलिकप्टर सोलुखुम्बुको लामजुरामा दुर्घटना भएपछि क्यानले अत्यावश्यक बाहेकका  उडानमा प्रतिबन्ध लगाएको हो।

बुधबार साँझ नेपाल नागरिक उड्डयन प्राधिकरण (क्यान) ले आफ्नो ट्वीटर अकाउन्टमा प्रतिबन्धबारे जानकारी गराउदै अनावश्यक उडानहरू जस्तै पहाड देखाउने उडान, अतिरिक्त भार सञ्चालन र हेलिकप्टरबाट पुष्पवृष्टिमा प्रतिबन्ध लगाइने जनाएको छ।

नेपालमा भर्खरै भएको अर्को हेलिकप्टर दुर्घटनापछि सरकारले यो प्रतिबन्ध लगाएको हो । मंगलबार हिमालको चुचुरोको भ्रमण गरेर फर्किने क्रममा मनाङ कम्पनीको हेलिकप्टर दुर्घटना भएको थियो । हेलिकप्टरमा नेपाली पाइलटसहित मेक्सिकन परिवारका पाँच पर्यटकको मृत्यु भएको थियो।