कक्षा १२ को ग्रेडवृद्धि (पूरक) परीक्षाको तालिका परिवर्तन

कक्षा १२ को ग्रेडवृद्धि (पूरक) परीक्षाको समय तालिका परिवर्तन भएको छ।

राष्ट्रिय परीक्षा बोर्ड, परीक्षा नियन्त्रण कार्यालयले बुधबार एक सूचना जारी गरी विशेष कारणले परीक्षाको समय तालिका परिवर्तन भएको जनाएको छ।

आउँदो असोज ६ गते शनिवार र ७ गते आइतवार सञ्चालन हुने भनिएको पूरक परीक्षा अब असोज ९ गते र १० गतेको बिहान ११ बजेदेखि २ बजेसम्म सञ्चालन हुने जनाएको छ ।

यस्तै विसं २०८० को कक्षा १२ को ग्रेडवृद्धि परीक्षामा सहभागी हुनका लागि यही भदौ २२ गतेभित्र बोर्डको खातामा परीक्षा शुल्क बापत प्रति विद्यार्थी छ सय रुपैयाँका दरले हुन आउने रकम बुझाइसक्न पनि राष्ट्रिय परीक्षा बोर्डले आग्रह गरेको छ।

त्यस अवधिभित्र रकम जम्मा गर्न छुटेका विद्यार्थीले यही भदौ २९ गते विलम्ब शुल्क सहितको रकम प्रति विद्यार्थी एक हजार दुई सय रुपैयाँ बुझाइ सम्बन्धित विद्यालयमार्फत् भदौ ३१ गते कार्यालय समयभित्र बोर्डका सम्बन्धित कार्यालयमा रकम जम्मा गरेको भौचरसहित आवेदन फाराम बुझाइसक्नुपर्ने सूचनामा उल्लेख छ।