जाजरकोटमा ६.४ रेक्टरस्केलको भूकम्प,मृतकको संख्या ७३ पुग्यो, १०८ जना घाइते

जाजरकोट केन्द्र बनाएर गएराति गएको ६.४ रेक्टरस्केलको भूकम्पले शनिबार विहानसम्म ७३ जनाले ज्यान गुमाएका छन् । १०८ जना घाइते भएका छन्।

शुक्रबार राति ११ बजेर ४७ मिनेटमा जाजरकोटको रामीडाँडा केन्द्रबिन्दु भएर आएको भूकम्पमा परेर अहिले शनिबार विहान छ बजेसम्मको तथ्याङ्क अनुसार ७३ जनाको मृत्यु हुनुका साथै १०८ जना घाइते भएको कर्णाली प्रदेश प्रहरी कार्यालयका प्रमुख डिआइजी भिम ढकालले जानकारी दिए ।

उद्दारका लागि प्रहरी खटिरहेको छ र मृतक र घाइतेको संख्या बढ्न सक्ने उनले बताए ।प्रहरीका अनुसार जाजरकोटमा ४४ जना र रुकुममा २७ जनाको शव निकालिएको छ।

प्रहरीले नेपालगञ्जबाट प्रहरी अस्पतालको टोली आवश्यक औषधिसहित खटाएको छ भने छिमेकी जिल्लाहरुबाट पनि उद्दारका लागि प्रहरी पठाएको जनाएको छ।रातिको समय भएकाले यकिन विवरण सङ्कलनमा कठिनाइ भएको जिल्ला प्रशासन कार्यालयले जनाएको छ ।

सुतिरहेको बेला भूकम्प गएकाले धेरै जना घर बाहिर निस्कन पाएका थिएनन् । सबैभन्दा ठूलो क्षति जाजरकोट र सिमाना जोडिएको रुकुम पश्चिममा भएको देखिन्छ ।

भूकम्पको धक्का धादिङसहित देशका धेरै ठाउँमा महसुस भएको थियो ।