टिकटक बनाउने क्रममा चिप्लिएर खोलामा बगेका दुई जनाको मृत्यु

तेह्रथुममा खोला किनारमा टिकटक बनाउने क्रममा चिप्लिएर खोलामा बगेका दुई जनाको मृत्यु भएको छ ।

जिल्ला प्रहरी कार्यालय तेह्रथुमका अनुसार मृत्यु हुनेमा तेह्रथुमको मेन्छ्यायेम गाउँपालिका–५ गौखुरी माविमा कार्यरत २३ वर्षीया नर्स रविना राजवंशी र त्यही विद्यालयमा कक्षा ७ मा अध्ययनरत १३ वर्षीया सुस्मिता भट्टराई रहेका छन् ।

रविना र सुस्मिता शनिवारको बिदा मनाउन खोरङ्वा खोलामा गएका र खोला किनारमा टिकटक बनाउने क्रममा उनीहरु चिप्लिएर खोलामा बगेका गौखुरी माविका सहायक प्रधानाध्यापक कमल सापकोटाले बताउनुभयो ।

बगेका दुई जनाको बेलुका शव भेटिएको जिल्ला प्रहरी कार्यालय तेह्रथुमका प्रमुख चिनिमाया तामाङले जानकारी दिनुभयो ।