धादिङबेशीमा भोलिदेखि दशौं धादिङ महोत्सव: तयारी पूरा, घरेलु उत्पादन प्रदर्शनीदेखि भैरवी मन्दिर पर्यटन प्रवर्द्धन कार्यक्रम प्राथमिकता

धादिङ । भोलि माघ १५ गतेदेखि धादिङबेसीमा सुरु हुने दशौं धादिङ महोत्सव–२०८२ को सम्पूर्ण तयारी पूरा भएको आयोजकले जनाएको छ।

बुधबार धादिङबेसीमा आयोजित पत्रकार सम्मेलनमार्फत दिइएको जानकारी अनुसार महोत्सवको सम्पूर्ण तयारी पूरा भएको छ।

महोत्सवको उद्घाटन पुर्व जिल्लाका विभिन्न जातजाति, भाषाभाषी र समुदायको मौलिक पहिचान झल्किने झाँकीमा भजनदेखि महिला बाजासम्मको आकर्षक प्रस्तुति रहने आयोजकले जनाएको छ।

महोत्सवको पहिलो दिन नै कृषि तथा घरेलु उत्पादनको प्रदर्शनी तथा प्रतियोगितासँगै सांस्कृतिक झाँकी प्रतियोगिता आयोजना हुने छ।

जिल्लाको कृषि, पर्यटन, उद्योग र सांस्कृतिक पहिचानलाई प्रवर्द्धन गर्ने उद्देश्यसहित आयोजना गरिएको महोत्सवको बिहान ११ बजे नेपाल उद्योग वाणिज्य महासंघका अध्यक्ष चन्द्रप्रसाद ढकालले औपचारिक उद्घाटन गर्ने कार्यक्रम तय गरिएको छ।

आयोजकका अनुसार महोत्सवले जिल्लाका स्थानीय उत्पादन, पर्यटन गन्तव्य, कला–संस्कृति र उद्यमशीलतालाई राष्ट्रियस्तरसम्म चिनाउन महत्वपूर्ण भूमिका खेल्ने अपेक्षा गरिएको छ।

महोत्सवका प्रमुख आकर्षणको रुपमा कृषि तथा घरेलु उत्पादनको प्रदर्शनी र प्रतियोगिता, सांस्कृतिक झाँकी प्रदर्शन तथा प्रतिस्पर्धा, भैरवी मन्दिर केन्द्रित विशेष पर्यटन प्रवर्द्धन कार्यक्रम, स्थानीय तहका मौलिक उत्पादनका स्टल, जिल्ला पशुसेवा, कृषि विकास र वन कार्यालयबाट सेवा तथा परामर्श, स्थानीय परिकार तथा सांस्कृतिक खानाको प्रदर्शनी, मनोरञ्जनात्मक मेला, बाल उद्यान संगै राष्ट्रिय तथा स्थानीय ख्यातिप्राप्त कलाकारद्वारा दैनिक सांस्कृतिक प्रस्तुति रहनेछ।

नीलकण्ठ नगरपालिका–३, धादिङबेसीस्थित खुल्लामञ्चमा धादिङ उद्योग वाणिज्य संघको आयोजनामा “धादिङको दीगो विकास र अर्थतन्त्रको आधार, कृषि, पर्यटन, जलस्रोत तथा उद्योगको पूर्वाधार” भन्ने मूल नाराका साथ सुरु हुने महोत्सव यही माघ २५ गतेसम्म सञ्चालन हुनेछ।