प्रदेशमा धादिङको ऐतिहासिक सफलता: छात्र/छात्रा कबड्डी टोलीलाई स्वर्ण,पदक तालिकामा धादिङ तेस्रो

धादिङ । १६ औँ बागमती प्रदेशस्तरीय राष्ट्रपति रनिङ शिल्ड प्रतियोगितामा धादिङ जिल्लाले ऐतिहासिक सफलता हासिल गरेको छ ।

प्रतियोगितामा धादिङका छात्र तथा छात्रा कबड्डी टोलीले स्वर्ण पदक जित्दै नयाँ इतिहास रचेका हुन् । कबड्डीतर्फ छात्र र छात्रा दुवै टोलीले एकै संस्करणमा स्वर्ण पदक जितेको यो पहिलो पटक हो ।

छात्र कबड्डी टोलीले फाइनलमा काभ्रेपलाञ्चोकलाई पराजित गर्दै स्वर्ण जितेको हो भने छात्रा टोलीले काठमाडौंलाई हराउँदै उपाधि हात पारेको धादिङ जिल्ला कबड्डी संघका कार्यवाहक अध्यक्ष तथा टिम म्यानेजर मनिष श्रेष्ठले जानकारी दिनुभयो।

गत वर्षको प्रतियोगितामा पनि धादिङको छात्रा कबड्डी टोलीले स्वर्ण पदक जितेको थियो भने छात्र कबड्डी टोलीले रजत पदक जितेको थियो ।

प्रतियोगिताको समग्र पदक तालिकामा धादिङ जिल्ला तेस्रो स्थान हासिल गर्न सफल भएको छ ।

धादिङले ६ स्वर्ण, ३ रजत र ११ कास्यसहित कुल २० पदक जितेको जिल्ला खेलकुद विकास समिति धादिङका अध्यक्ष प्रतापसिंह तामाङले जानकारी दिनुभयो ।

अध्यक्ष तामाङले धादिङको यो उपलब्धि राष्ट्रपति रनिङ शिल्डको इतिहासमै जिल्लाका लागि सबैभन्दा ठूलो सफलता भएको बताउनुभयो । उहाँले भन्नुभयो, “खेलाडीहरूको निरन्तर मेहनत, प्रशिक्षकको समर्पण र अभिभावक तथा जिल्लावासीको साथका कारण धादिङले यो ऐतिहासिक उपलब्धि हासिल गरेको हो । यसले जिल्लाको खेलकुद क्षेत्रको क्षमता र सम्भावनालाई थप उजागर गरेको छ ।”

धादिङका लागि उत्सव पुरीले उसुमा, सिर्जना श्रेष्ठ र रितिक बस्यालले एथलेटिक्समा, सुमन घलेले तेक्वान्दो (४८ केजी) मा तथा छात्र/छात्रा कबड्डी टोलीले स्वर्ण पदक जितेका थिए ।

त्यसैगरी अन्जली चेपाङले एथलेटिक्समा, धनलक्ष्मी श्रेष्ठले ट्रिपल जम्पमा तथा छात्रा ४×४०० मिटर रिले टोलीले रजत पदक हात पारेका थिए ।

कास्य पदक जित्ने खेलाडी तथा टोलीहरूमा बिबेक तामाङ र जोशिला तामाङ (कराते), डोल्मा तामाङ र सम्राट थापा (उसु), सुमि विश्वकर्मा, पाबल तामाङ, प्रदीप तामाङ र कविता तामाङ (तेक्वान्दो) तथा छात्र भलिबल टोली रहेका छन् ।

प्रदेशभरका १३ जिल्ला सहभागी यस प्रतियोगितामा काठमाडौं जिल्लाले प्रथम स्थान हासिल गर्यो भने ललितपुर दोस्रो भएको छ।

गत वर्ष धादिङले २ स्वर्णसहित २० पदक जितेको थियो । यस वर्ष भने स्वर्ण पदक संख्या बढाउँदै धादिङले प्रदेशस्तरमा ऐतिहासिक उपलब्धि हासिल गरेको हो ।