अहिल्यै सरकारलाई आलोचना वा कठघरामा उभ्याउने समय नआएको सांसद श्रेष्ठको भनाई

धादिङ । धादिङ क्षेत्र नम्बर २ बाट निर्वाचित संघिय सांसद बोधनारायण श्रेष्ठले वर्तमान सरकारलाई आलोचना वा कठघरामा उभ्याउने समय अझै नआएको बताउनुभएको छ ।

बुधबार नेपाल पत्रकार महासंघ धादिङ शाखाको २४ औँ साधारणसभा उद्घाटन कार्यक्रमलाई सम्बोधन गर्दै सांसद श्रेष्ठले सरकार गठन भएको छोटो समय मात्र भएकाले यसको कार्यसम्पादनको समीक्षा गर्न हतार गर्न नहुने बताउनुभयो ।

उहाँले संसदीय अभ्यासअनुसार सरकार गठनपछिको प्रारम्भिक १०० दिनलाई ‘हनिमुन अवधि’ मानिने उल्लेख गर्दै सो अवधिभित्र सरकारले आफ्नो नीति तथा कार्यक्रम कार्यान्वयनको आधार तयार गर्ने बताउनुभयो ।

पत्रकारहरूलाई सम्बोधन गर्ने क्रममा उहाँले सञ्चार क्षेत्रबाट उठाइने कतिपय प्रश्नहरूको समय सान्दर्भिक हुनुपर्नेमा जोड दिनुभयो ।

सञ्चारमैत्री कानुन निर्माण नभएको विषयलाई वर्तमान सरकारसँग मात्र जोडेर हेर्न नमिल्ने उहाँको भनाइ थियो।

कार्यक्रममा नेपाल पत्रकार महासंघकी केन्द्रीय उपाध्यक्ष नितु पण्डितले श्रमजीवी पत्रकारहरूको अधिकार, सुरक्षा तथा प्रेस स्वतन्त्रताको संरक्षणमा महासंघ निरन्तर सक्रिय रहेको बताउनुभयो ।

त्यसैगरी महासंघका केन्द्रीय कोषाध्यक्ष रामकृष्ण अधिकारीले पत्रकारिता क्षेत्रको संस्थागत सुदृढीकरणका लागि आर्थिक पारदर्शिता र दिगोपन महत्वपूर्ण रहेको बताउनुभयो ।