कार्यसम्पादन मूल्याङ्कनमा धादिङ प्रहरी लगातार दोस्रो पटक उत्कृष्ट

धादिङ । जिल्ला प्रहरी कार्यालय धादिङ मासिक कार्यसम्पादन मूल्याङ्कनमा पुनः उत्कृष्ट भएको छ।

नेपाल प्रहरी प्रधान कार्यालयद्वारा गरिएको जेठ महिनाको मूल्याङ्कनमा धादिङ प्रहरी देशभरका प्रहरी उपरीक्षक (एसपी) नेतृत्वका १५ पहाडी जिल्लामध्ये पहिलो स्थानमा पर्न सफल भएको हो।

यसअघि वैशाख महिनाको मूल्याङ्कनमा समेत प्रथम बनेको धादिङ प्रहरीले लगातार दोस्रो महिनासम्म उत्कृष्टता कायम राख्दै आफ्नो कार्यक्षमता प्रमाणित गरेको छ।

प्रहरी प्रधान कार्यालयले गर्ने मूल्याङ्कनमा प्रशासनिक सुधार, अभिलेख व्यवस्थापन, अपराध नियन्त्रण तथा अनुसन्धान, पुराना मुद्दाको फर्छ्योट, फैसला कार्यान्वयनलगायतका सूचकलाई आधार मानिन्छ। धादिङ प्रहरीले यी क्षेत्रमा प्रभावकारी कार्यसम्पादन गर्दै उच्च अंक प्राप्त गरेको जनाइएको छ।

त्यसैगरी, जिल्लाको भौगोलिक तथा राजमार्गीय संवेदनशीलतालाई ध्यानमा राख्दै सडक सुरक्षा, सवारी व्यवस्थापन, प्रहरी परिचालन, उजुरी तथा गुनासो सुनुवाइ र विपद् व्यवस्थापनमा देखाएको सक्रिय भूमिकाले पनि उत्कृष्ट नतिजा हासिल गर्न सहयोग पुगेको बताइएको छ।

पछिल्लो समय समुदाय–प्रहरी साझेदारी कार्यक्रममार्फत नागरिकसँगको सम्बन्धलाई अझ सुदृढ बनाउँदै सामाजिक विकृति, विसंगति तथा अपराध नियन्त्रणका क्षेत्रमा सञ्चालन गरिएका गतिविधिले समेत सकारात्मक प्रभाव पारेको देखिएको छ।

प्रहरी संगठनभित्र स्वस्थ प्रतिस्पर्धा सिर्जना गर्दै सेवा प्रवाह, शान्ति सुरक्षा र जनविश्वास अभिवृद्धिमा यस्ता मूल्याङ्कनले महत्वपूर्ण भूमिका खेल्ने विश्वास गरिएको छ।

जिल्ला प्रहरी कार्यालय धादिङले प्राप्त उपलब्धिले आगामी दिनमा अझ जिम्मेवार, उत्तरदायी र सेवामुखी भएर काम गर्न थप प्रेरणा मिलेको जनाएको छ।