विद्यालयमै पुगेर विद्यार्थीका कुरा सुन्दै ज्वालामुखीका अध्यक्ष

धादिङ । ज्वालामुखी गाउँपालिकाले सामुदायिक विद्यालयको शैक्षिक अवस्था सुधार गर्ने उद्देश्यसहित विद्यालय केन्द्रित संवाद कार्यक्रम सुरु गरेको छ।

यसअन्तर्गत गाउँपालिकाका अध्यक्ष यमनाथ दनै स्वयं विद्यालयमा पुगेर विद्यार्थी, शिक्षक तथा अभिभावकसँग प्रत्यक्ष अन्तरक्रियामा सहभागी हुनुभएको छ ।

मंगलबारदेखि सुरु भएको कार्यक्रम अन्तर्गत वडा नम्बर ६ र ७ मा रहेका सुनखानी माध्यमिक विद्यालय, सालबास माध्यमिक विद्यालय र भुवनेश्वरी माध्यमिक विद्यालयमा छलफल तथा साक्षात्कार कार्यक्रम सञ्चालन गरिएको हो।

कार्यक्रममा सहभागी विद्यार्थीहरूले विज्ञान प्रयोगशाला, पुस्तकालय, खेलकुद सामग्री, विषयगत शिक्षकको अभाव, नियमित पठनपाठनको अवस्था तथा गुणस्तरीय शिक्षाका लागि स्थानीय सरकारले गरेका प्रयासबारे जिज्ञासा राखेका थिए।

उनीहरूले आगामी दिनमा शिक्षा क्षेत्रमा थप सुधारका लागि आवश्यक योजनाबारे पनि प्रश्न गरेका थिए। त्यसैगरी शिक्षकहरूले पर्याप्त दरबन्दीको व्यवस्था, विद्यालय पूर्वाधार सुधार तथा सेवा-सुविधासँग सम्बन्धित विषय उठाएका थिए।

अभिभावकहरूले सामुदायिक विद्यालयको शैक्षिक स्तर अझ सुदृढ बनाउनुपर्ने आवश्यकता औँल्याउँदै गुणस्तरीय शिक्षामा जोड दिएका थिए।

सहभागीहरूको जिज्ञासा र सुझावको जवाफ दिँदै गाउँपालिका अध्यक्ष दनैले शिक्षा क्षेत्रको विकासका लागि विद्यार्थी, शिक्षक, अभिभावक र स्थानीय सरकारबीच सहकार्य आवश्यक रहेको बताउनुभयो ।

विद्यालयका वास्तविक समस्या बुझ्न र समाधानका उपाय खोज्न गाउँपालिका प्रत्यक्ष रूपमा विद्यालयसम्म पुगेको उहाँको भनाइ थियो।उहाँले शिक्षा क्षेत्रमा सुधार क्रमशः अगाडि बढिरहेको उल्लेख गर्दै आवश्यक स्रोत–साधन र लगानी व्यवस्थापनमा गाउँपालिका प्रतिबद्ध रहेको बताउनुभयो ।

गाउँपालिकाका शिक्षा अधिकृत विष्णुप्रसाद न्यौपानेले शिक्षा क्षेत्रलाई स्थानीय सरकारको प्राथमिकतामा राखिएको जानकारी दिँदै विद्यालयका समस्या पहिचान गरेर सुधारका कार्यक्रम अघि बढाइने बताउनुभयो । गुणस्तरीय शिक्षामार्फत पालिकाको समग्र विकास सम्भव हुने बताउनुभयो ।

अध्यक्षसँग प्रत्यक्ष साक्षात्कार कार्यक्रम आगामी दिनमा पालिकाभित्र रहेका सबै माध्यमिक विद्यालयमा विस्तार गरिने गाउँपालिकाले जनाएको छ।

कार्यक्रमका केही झलकहरु :