प्रदेश स्तरिय खेलकुदमा धादिङलाई ९ स्वर्ण,समग्र पदक तालिकामा नवौं

धादिङ । तेस्रो बागमती प्रदेश खेलकुद प्रतियोगितामा धादिङ जिल्लाले उल्लेखनीय प्रदर्शन गर्दै ९ स्वर्ण, १० रजत र २२ कास्यसहित कुल ४१ पदक हात पार्न सफल भएको छ।

असार १ गतेदेखि १० गतेसम्म सञ्चालन भएको प्रदेशस्तरीय प्रतियोगितामा प्रदेशको बिभिन्न जिल्लाका खेलाडीबीच प्रतिस्पर्धा भएको थियो।

प्रतियोगिताको समग्र पदक तालिकामा धादिङ नवौं स्थानमा रह्यो। प्रतियोगितामा काठमाडौं ५१ स्वर्णसहित पहिलो, ललितपुर ४६ स्वर्णसहित दोस्रो तथा चितवन ३० स्वर्णसहित तेस्रो स्थानमा रहन सफल भए।धादिङका लागि महिला भलिबल टोलीले स्वर्ण पदक जित्न सफल भयो ।

त्यस्तै ब्याडमिन्टन पुरुष डबल्समा राम ठकुरी र लक्ष्मण ठकुरीले स्वर्ण जिते । बक्सिङतर्फ बिना महर्जन (६६ केजी), मिलन सार्की (५७ केजी) र हिमाल शाही (६० केजी) ले आ-आफ्नो तौल समूहमा स्वर्ण पदक हासिल गरे।

एथ्लेटिक्सको सटपुटमा सिर्जना श्रेष्ठ, तेक्वान्दोमा सुमन घले तथा करातेमा निसन घले र निसन मल्लले पनि स्वर्ण पदक जित्न सफल भए ।

पछिल्ला वर्षहरूमा जिल्लाको खेलकुद क्षेत्र क्रमशः सुदृढ बन्दै गएको जिल्ला खेलकुद विकास समिति धादिङका अध्यक्ष प्रतापसिंह तामाङले बताउनुभयो।

विद्यालयस्तरबाट खेलकुद गतिविधि विस्तार र खेलाडी उत्पादनमा गरिएको लगानीको सकारात्मक परिणाम प्रदेशस्तरीय प्रतियोगितामा देखिन थालेको उहाँको भनाइ छ।

धादिङ जिल्लाले प्रदेशस्तरीय राष्ट्रपति रनिङ शिल्ड प्रतियोगितातर्फ भने उत्कृष्ट प्रदर्शन गर्दै तेस्रो स्थान हासिल गरेको थियो।