ढोला स्वास्थ्य चौकी फेरि जिल्लाकै उत्कृष्ट

धादिङ । धादिङको ज्वालामुखी गाउँपालिका-४ स्थित ढोला स्वास्थ्य चौकी पुनः जिल्लाकै उत्कृष्ट स्वास्थ्य संस्था घोषित भएको छ।

स्वास्थ्य संस्थाहरूको न्यूनतम सेवा मापदण्ड (एमएसएस) फलोअप मूल्याङ्कनमा जिल्लाकै उत्कृष्ट स्वास्थ्य संस्था घोषित भएको हो।

यो उपलब्धिसँगै ढोला स्वास्थ्य चौकीले लगातार तेस्रो वर्ष जिल्लाभर प्रथम स्थान हासिल गर्दै ह्याट्रिक गरेको छ।

जनस्वास्थ्य कार्यालय धादिङ र सम्बन्धित स्थानीय तहद्वारा गरिएको मूल्याङ्कनमा ढोला स्वास्थ्य चौकीले सुशासन तथा व्यवस्थापन, क्लिनिकल सेवा र सहयोगी सेवातर्फ ९६ प्रतिशत अंक प्राप्त गर्दै पहिलो स्थान सुरक्षित गरेको हो।

मूल्याङ्कनअनुसार थाक्रे गाउँपालिकाको महादेवबेशी स्वास्थ्य चौकी र बेनीघाट–रोराङ गाउँपालिकाको जोगिमारा स्वास्थ्य चौकीले ९३ प्रतिशत अंकसहित संयुक्त रूपमा दोस्रो स्थान प्राप्त गरेका छन्।

नीलकण्ठ नगरपालिकाको मुरलीभञ्ज्याङ स्वास्थ्य चौकी ९२ प्रतिशत अंकसहित तेस्रो स्थानमा रहेको छ।

ढोला स्वास्थ्य चौकीले आर्थिक वर्ष २०८०/०८१, २०८१/०८२ र २०८२/०८३ मा लगातार तीन वर्ष जिल्लाभर प्रथम स्थान हासिल गरेको छ।

त्यस्तै आर्थिक वर्ष २०७८/०७९ देखि २०८२/०८३ सम्म ज्वालामुखी गाउँपालिकाभित्र लगातार पाँच वर्ष उत्कृष्ट स्वास्थ्य संस्था बन्न सफल भएको छ।

स्थानीय सरकार, स्वास्थ्यकर्मी, महिला स्वास्थ्य स्वयंसेविका र समुदायबीचको प्रभावकारी सहकार्यले यो सफलता सम्भव भएको ज्वालामुखी गाउँपालिकाका स्वास्थ्य शाखा प्रमुख सुजन श्रेष्ठले बताउनुभयो।

गाउँपालिकाले पछिल्ला वर्षहरूमा स्वास्थ्य क्षेत्रमा विभिन्न नवीन तथा जनमुखी कार्यक्रम सञ्चालन गर्दै आएको उहाँको भनाइ छ।

गाउँपालिकाले ‘एक वडा एक स्वास्थ्यकर्मी’ कार्यक्रममार्फत प्रत्येक वडामा स्वास्थ्य सेवाको पहुँच विस्तार गरेको छ भने ‘घरदैलोमा जनस्वास्थ्य सेवा’ कार्यक्रममार्फत नागरिकको घरघरमा सेवा पु¥याउने अभ्यासलाई निरन्तरता दिएको छ।

सुरक्षित मातृत्व प्रवर्द्धनका लागि ‘नमुना आमा सुरक्षा कार्यक्रम’ सञ्चालन गरिएको छ।

त्यस्तै बागमती प्रदेशमै पहिलो पटक शतप्रतिशत संस्थागत सुत्केरी सुनिश्चित गर्दै ज्वालामुखी गाउँपालिकाले ‘घरमा सुत्केरी शून्य पालिका’ घोषणा गरी त्यसको दिगोपना प्रमाणीकरणसमेत प्राप्त गरेको छ।

‘कोखदेखि शोकसम्म ज्वालामुखी सरकार’ अवधारणाअन्तर्गत जन्मदेखि वृद्धावस्थासम्म नागरिकको स्वास्थ्य सुरक्षालाई केन्द्रमा राखेर विभिन्न कार्यक्रम सञ्चालन हुँदै आएका छन्।

स्वास्थ्य र सरसफाइलाई उच्च प्राथमिकतामा राखेर गरिएको लगानी तथा नागरिक, जनप्रतिनिधि र कर्मचारीहरूको सामूहिक प्रयासले उल्लेखनीय उपलब्धि हासिल भएको गाउँपालिकाका अध्यक्ष यमनाथ दनैले बताउनुभयो।

उहाँले आगामी दिनमा पनि स्वास्थ्य क्षेत्रको गुणस्तर अभिवृद्धि गर्दै उत्कृष्ट कार्यलाई निरन्तरता दिने प्रतिबद्धता व्यक्त गर्नुभयो।